کیلیفورنیا: گوگل نے اینڈرائیڈ اور آئی فون کے صارفین کے لیے ایک نیا شیئرنگ فیچر متعارف کرایا ہے جس سے دونوں پلیٹ فارمز کے درمیان فائل ٹرانسفر کرنا اور بھی آسان اور تیز ہو گیا ہے۔ اس فیچر کا نام "کُوئک شیئر” رکھا گیا ہے، جو ایئر ڈراپ کے نظام کے ساتھ ہم آہنگ ہے اور فائل کی منتقلی کے عمل کو مزید تیز اور سادہ بناتا ہے۔
گوگل کے مطابق، یہ فیچر فی الحال پکسل 10 سیریز میں دستیاب ہے، اور اس کے ذریعے اینڈرائیڈ اور آئی فون کے صارفین کے درمیان فوری اور مؤثر فائل شیئرنگ ممکن ہوگی۔ کمپنی نے اس فیچر کی خصوصیات کو جدید سکیورٹی معیارات کے مطابق تیار کیا ہے، جسے آزاد سکیورٹی ماہرین نے بھی محفوظ قرار دیا ہے۔ اس سے اینڈرائیڈ، آئی فون اور ونڈوز کے درمیان ربط اور ہم آہنگی کے امکانات میں بھی اضافہ ہو گا۔
یہ فیچر خاص طور پر آر سی ایس میسیجنگ اور نامعلوم ٹریکر الرٹس جیسے دیگر نئے فیچرز کے بعد بہت کارآمد ثابت ہو گا۔ گوگل نے یہ بھی بتایا کہ آنے والے مہینوں میں اس سروس کو مزید بہتر بنا کر اسے زیادہ اینڈرائیڈ ڈیوائسز تک پہنچایا جائے گا۔
صارفین پکسل 10 پرو پر ویڈیو کے ذریعے اس فیچر کی عملی جھلک دیکھ سکتے ہیں اور خود بھی اس نئے ٹرانسفر سسٹم کو آزما سکتے ہیں.
