اسلام آباد: پاکستان اور مصر کے درمیان دفاعی اور سٹریٹجک تعلقات کو مزید مستحکم کرنے کے لیے اہم ملاقات ہوئی ہے جس میں پاکستان کے فیلڈ مارشل سید عاصم منیر اور مصر کے وزیر خارجہ ڈاکٹر بدر احمد محمد عبدالعاطی نے دونوں ممالک کے باہمی تعلقات کو مزید گہرا کرنے اور دفاعی تعاون بڑھانے کے عزم کا اعادہ کیا۔
آئی ایس پی آر کے مطابق، ملاقات میں دونوں رہنماؤں نے دوطرفہ تعلقات خصوصاً دفاعی تعاون، سکیورٹی امور، عسکری روابط اور تربیتی اشتراک کے حوالے سے تفصیلاً گفتگو کی۔ دونوں رہنماؤں نے اس بات پر زور دیا کہ خطے کی بدلتی ہوئی سکیورٹی صورتحال کے پیش نظر، اعلیٰ سطحی رابطوں کا تسلسل ضروری ہے تاکہ ابھرتے ہوئے چیلنجز کا مؤثر طریقے سے مقابلہ کیا جا سکے۔
ملاقات کے دوران، وزیر خارجہ ڈاکٹر بدر احمد نے مصر کی قیادت کی جانب سے پاکستان کے ساتھ تعاون کو مزید بڑھانے کی خواہش کا اظہار کیا اور کہا کہ مصر ہر سطح پر پاکستان کے ساتھ اپنے تعلقات کو مزید مستحکم کرنے کے لیے پرعزم ہے۔
