لاہور : لاہور کے تاریخی واہگہ بارڈر پر ‘معرکہ حق’ کی کامیابی کا ایک سال مکمل ہونے پر ایک پروقار تقریب منعقد ہوئی، جس میں وزیراعلیٰ پنجاب مریم نواز نے بطور مہمانِ خصوصی شرکت کر کے شہدا اور غازیوں کی شجاعت کو خراجِ عقیدت پیش کیا۔
تقریب میں صوبائی وزیر اطلاعات عظمیٰ بخاری اور دیگر اہم رہنما بھی وزیراعلیٰ کے ہمراہ شریک تھے۔ اس موقع پر واہگہ بارڈر پر عوام کا جوش و خروش دیدنی تھا؛ شہریوں کی بڑی تعداد نے قومی پرچم لہرا کر اور ‘پاکستان زندہ باد’ کے فلک شگاف نعرے لگا کر پاک فوج اور ملکی دفاع کے ساتھ اپنی والہانہ محبت کا اظہار کیا۔
وزیراعلیٰ مریم نواز نے یادگارِ شہدا پر پھولوں کی چادر چڑھائی اور ملک کی سلامتی کے لیے دی جانے والی عظیم قربانیوں کو سراہا۔ انہوں نے اپنے خطاب میں کہا کہ معرکہ حق کی کامیابی ہماری دفاعی تاریخ کا وہ سنہرا باب ہے جس نے دشمن کے ناپاک عزائم کو خاک میں ملا دیا۔ تقریب کے شرکاء نے اس عزم کا اعادہ کیا کہ پوری قوم اپنی افواج کے شانہ بشانہ کھڑی ہے اور وطنِ عزیز کی سرحدوں کی حفاظت کے لیے کسی بھی قربانی سے دریغ نہیں کیا جائے گا۔
