اسلام آباد: وفاقی وزیر خزانہ محمد اورنگزیب نے گیس سیکٹر کو مالی طور پر مستحکم اور مسابقتی بنانے کے لیے اصلاحاتی عمل آگے بڑھانے پر زور دیا ہے۔ حکومت نے گیس سیکٹر کی تنظیم نو، ڈی ریگولیشن، گردشی قرضے اور کراس سبسڈیز جیسے مسائل کے حل کے لیے جامع اصلاحاتی فریم ورک تیار کرنے پر غور کیا ہے۔
محمد اورنگزیب کی زیر صدارت ہونے والے اجلاس میں وزیر پیٹرولیم، مشیر نجکاری، معاون خصوصی برائے توانائی اور عالمی بینک کے نمائندوں نے شرکت کی۔ اجلاس میں گیس سیکٹر کی موجودہ صورت حال اور مجوزہ اصلاحات کے مختلف پہلوؤں کا جائزہ لیا گیا۔
شرکا نے گیس سیکٹر کے گردشی قرضے، غیر حساب شدہ نقصانات، کراس سبسڈیز اور طلب و رسد میں عدم توازن کو دور کرنے کی ضرورت پر زور دیا۔ اجلاس میں گیس کمپنیوں کی مالی استعداد اور عملیاتی کارکردگی بہتر بنانے، نجی سرمایہ کاری کی راہ ہموار کرنے اور گیس کی قیمتوں کو مستحکم اور پائیدار بنانے کے لیے مختلف تجاویز پر غور کیا گیا۔
اجلاس کو بریفنگ میں برآمد کنندگان کو مسابقتی نرخوں پر گیس کی فراہمی بہتر بنانے اور کاروبار سے کاروبار کی بنیاد پر لین دین کو فروغ دینے کے اقدامات سے آگاہ کیا گیا۔ شرکا کو بتایا گیا کہ اصلاحات کے نتیجے میں نجی سرمایہ کاری بڑھانے، توانائی کے تحفظ کو بہتر بنانے اور مالیاتی و حکومتی مالیاتی خطرات کم کرنے میں مدد مل سکتی ہے۔
اجلاس میں گیس سیکٹر کی اصلاحات کے لیے ترکیہ اور برطانیہ کے تجربات سے استفادہ کرنے پر بھی روشنی ڈالی گئی۔ وزیر خزانہ محمد اورنگزیب نے متعلقہ فریقوں کے درمیان اتفاق رائے پیدا کرنے اور ایسا اصلاحاتی ڈھانچہ مرتب کرنے کی ضرورت پر زور دیا جو عملی طور پر قابلِ عمل ہو۔
اجلاس میں اس بات پر اتفاق کیا گیا کہ اصلاحات مرحلہ وار اور مشاورت کے ساتھ نافذ کی جائیں گی تاکہ گیس کی بلا تعطل فراہمی برقرار رکھنے اور صارفین کے مفادات کے تحفظ کو یقینی بنایا جا سکے۔
گیس سیکٹر کا مجوزہ اصلاحاتی فریم ورک وزیراعظم کو پیش کیا جائے گا، جس کے بعد اس پر مزید تکنیکی کام اور متعلقہ فریقوں سے مشاورت کی جائے گی۔
