لاہور : پنجاب کی کاؤنٹر ٹیرارزم ڈیپارٹمنٹ (سی ٹی ڈی) نے ایک بڑی کارروائی کے دوران بھارتی خفیہ ایجنسی "را” کے 12 دہشت گردوں کو گرفتار کر لیا ہے۔ ان دہشت گردوں کے قبضے سے بھاری مقدار میں اسلحہ، بارودی مواد، ڈیٹونیٹر، آئی ای ڈی بم، اور نقدی برآمد ہوئی ہے۔ سی ٹی ڈی کے مطابق، یہ دہشت گرد حساس مقامات اور اداروں کی تصاویر، ویڈیوز اور لوکیشنیں بھی اپنے ساتھ رکھتے تھے، جو ان کے دہشت گردانہ منصوبوں کا حصہ تھیں۔
گرفتار دہشت گردوں میں فیصل آباد، لاہور اور بہاولپور کے رہائشی شامل ہیں۔ لاہور سے گرفتار ہونے والے دہشت گردوں میں دیپ سنگھ، عظمت، فیضان، نبیل ابرار اور عثمان سرفراز شامل ہیں۔ فیصل آباد سے دانش اور بہاولپور سے فتنہ الہندوستان کے دہشت گرد رجب، ہاشم، ثاقب اور عارف کو بھی پکڑا گیا ہے۔ سی ٹی ڈی کے مطابق، یہ دہشت گرد مختلف حساس مقامات پر حملے اور مذہبی منافرت پھیلانے کی منصوبہ بندی کر رہے تھے۔
حکام نے مزید بتایا کہ دہشت گردوں کے قبضے سے ایک مدرسے اور ایک میلے کی تصاویر، ویڈیوز اور لوکیشنیں بھی برآمد ہوئیں، جس سے ان کی منصوبہ بندی کے بارے میں مزید معلومات حاصل ہوئیں۔ ان دہشت گردوں کو بھارتی فیس بک آئی ڈی "عادل” کی مدد سے گرفتار کیا گیا، جو بھارت میں "را” کی آپریشنل سرگرمیوں میں ملوث تھی۔
سی ٹی ڈی کے مطابق، یہ دہشت گرد بھارتی ایجنسی "را” سے بھاری فنڈنگ حاصل کر رہے تھے تاکہ پاکستان میں دہشت گردی کی کارروائیاں کی جا سکیں۔ ان کے قبضے سے آئی ای ڈی بم، 7 ڈیٹونیٹر، 102 فٹ حفاظتی فیوز وائر، موبائل فونز اور نقدی بھی برآمد ہوئی ہے۔
سی ٹی ڈی نے ان دہشت گردوں کے خلاف مقدمات درج کر کے مزید تحقیقات کا آغاز کر دیا ہے تاکہ ان کے نیٹ ورک کا پتہ چلایا جا سکے اور مستقبل میں دہشت گردی کی کارروائیوں کو روکا جا سکے۔
