دوشنبے: نائب وزیراعظم و وزیر خارجہ اسحاق ڈار شنگھائی تعاون تنظیم کے سربراہانِ حکومت کے دو روزہ اجلاس میں شرکت کے لیے تاجکستان کے دارالحکومت دوشنبے پہنچ گئے۔
ترجمان دفتر خارجہ کے مطابق اسحاق ڈار 19 اور 20 اکتوبر کو ہونے والے اجلاس میں پاکستانی وفد کی قیادت کریں گے۔ اجلاس میں رکن ممالک کے درمیان معاشی، تجارتی اور مالیاتی شعبوں میں تعاون کو فروغ دینے کے مختلف امکانات کا جائزہ لیا جائے گا۔
دوشنبے ایئرپورٹ پر تاجکستان کے وزیر برائے توانائی و آبی وسائل نے نائب وزیراعظم اسحاق ڈار کا استقبال کیا۔
دورے کے دوران اسحاق ڈار کی تاجکستان کے صدر اور وزیراعظم سے ملاقاتیں بھی متوقع ہیں، جن میں دوطرفہ تعلقات کو مزید مستحکم بنانے اور باہمی دلچسپی کے امور پر تبادلۂ خیال کیا جائے گا۔
