بھارت خود کو ’وشوا گرو‘ ثابت کرنا چاہتا ہے، لیکن حقیقت کچھ اور ہے: فیلڈ مارشل عاصم منیر

واشنگٹن :  چیف آف آرمی اسٹاف اور فیلڈ مارشل سید عاصم منیر نے اپنے حالیہ دورہ امریکہ کے دوران پاکستانی کمیونٹی سے خطاب کرتے ہوئے کہا کہ بیرون ملک مقیم پاکستانی وطن عزیز کا قیمتی اثاثہ ہیں، اور ان کی وطن سے محبت اور وابستگی قابلِ فخر ہے۔

فیلڈ مارشل نے کہا کہ امریکہ میں مقیم پاکستانیوں سے خطاب ان کے لیے اعزاز کی بات ہے۔ انہوں نے بیرون ملک پاکستانیوں کو "برین ڈرین” کے بجائے "برین گین” قرار دیتے ہوئے کہا کہ وہ پاکستان کی ترقی و خوشحالی میں اہم کردار ادا کر رہے ہیں۔

اپنے خطاب میں فیلڈ مارشل نے بھارت کی پالیسیوں کو شدید تنقید کا نشانہ بناتے ہوئے کہا کہ بھارت خود کو "وشوا گرو” کے طور پر پیش کرنا چاہتا ہے، لیکن زمینی حقائق اس کے برعکس ہیں۔ انہوں نے کہا کہ بھارت کی خفیہ ایجنسی RAW کی بین الاقوامی دہشتگرد سرگرمیاں عالمی سطح پر تشویش کا باعث بن چکی ہیں، جن کی مثالیں کینیڈا میں سکھ رہنما کا قتل، قطر میں آٹھ بھارتی نیول افسران کا معاملہ، اور کلبھوشن یادیو جیسے واقعات ہیں۔

انہوں نے کہا کہ پاکستان نے بھارت کی دوغلی پالیسیوں کے خلاف کامیاب سفارتی جنگ لڑی ہے، اور حالیہ بھارتی جارحیت نے خطے کو ایک خطرناک جنگ کے دہانے پر لا کھڑا کیا تھا۔ انہوں نے سابق امریکی صدر ڈونلڈ ٹرمپ کی اسٹریٹجک قیادت کا شکریہ ادا کیا جن کی کوششوں سے انڈیا-پاکستان جنگ کا خطرہ ٹلا۔

فیلڈ مارشل نے زور دیا کہ مقبوضہ کشمیر بھارت کا اندرونی مسئلہ نہیں بلکہ ایک بین الاقوامی تنازع ہے، جس پر اقوامِ متحدہ کی قراردادیں موجود ہیں۔ انہوں نے قائداعظم محمد علی جناح کا حوالہ دیتے ہوئے کہا کہ "کشمیر پاکستان کی شہ رگ ہے۔”

افغانستان کی صورتحال پر بات کرتے ہوئے انہوں نے کہا کہ وہاں سے دہشتگرد گروہ، بشمول "فتنہ الخوارج”، پاکستان کے خلاف سرگرم ہیں۔ ان کا کہنا تھا کہ پاکستان اس وقت دہشتگردی کے خلاف آخری فصیل ہے، اور دہشتگردوں کے ساتھ کسی قسم کی نرمی نہیں برتی جائے گی۔

فیلڈ مارشل سید عاصم منیر نے سوشل میڈیا کے کردار پر بات کرتے ہوئے کہا کہ یہ ایک طاقتور ذریعہ بن چکا ہے، لیکن ملک دشمن عناصر اس کا غلط استعمال کر کے "ساختہ افراتفری” پیدا کرنے کی کوشش کر رہے ہیں۔ انہوں نے قرآن مجید کی آیت کا حوالہ دیتے ہوئے کہا کہ خبر کی تصدیق کیے بغیر کسی پر الزام نہ لگائیں۔

انہوں نے نوجوانوں کی اہمیت پر زور دیتے ہوئے کہا کہ پاکستان کی 64 فیصد آبادی نوجوانوں پر مشتمل ہے، جن کی صلاحیتیں ملک کے روشن مستقبل کی ضمانت ہیں۔

فیلڈ مارشل نے کہا کہ ان کا حالیہ دورہ، جو صرف ڈیڑھ ماہ کے وقفے کے بعد ہوا، پاک-امریکہ تعلقات میں نئی جہت کا اشارہ ہے۔ انہوں نے بتایا کہ مختلف شعبوں میں امریکہ، سعودی عرب، متحدہ عرب امارات اور چین کے ساتھ معاشی معاہدوں پر عمل جاری ہے، جس سے پاکستان میں سرمایہ کاری بڑھے گی۔

انہوں نے کہا کہ پاکستان کی موجودہ سفارتی اور سیکیورٹی کامیابیاں اللہ کی رحمت، قومی یکجہتی، سیاسی قیادت کی بصیرت اور مسلح افواج کی پیشہ ورانہ مہارت کا نتیجہ ہیں۔

فیلڈ مارشل نے پاکستانیوں کو ایک نئے عزم کے ساتھ متحد ہو کر آگے بڑھنے کی دعوت دی۔ ان کا کہنا تھا:
"اب سوال یہ نہیں کہ ہم کب اٹھیں گے، بلکہ یہ ہے کہ ہم کتنی جلدی اور کتنی قوت سے اٹھیں گے۔”
انہوں نے اپنے خطاب کا اختتام اپنے آبا و اجداد کی قربانیوں کو یاد کرتے ہوئے ایک نئے قومی جذبے کے ساتھ پاکستان کے روشن مستقبل کی تعمیر کی اپیل کے ساتھ کیا۔