چیف جسٹس آف پاکستان، جسٹس یحییٰ آفریدی نے یومِ آزادی کے موقع پر اپنے پیغام میں کہا ہے کہ آئین پاکستان عوام کی امنگوں کا مظہر ہے، جو بنیادی حقوق کی ضمانت دیتا ہے اور ان کی آزادیوں کی حفاظت کرتا ہے۔
انہوں نے کہا کہ یہ دن ہمارے بزرگوں کی قربانیوں، عزم اور نظریے کی یاد دلاتا ہے، اور ہمیں ان کے خوابوں کو عملی جامہ پہنانے کے عہد کی تجدید کا موقع دیتا ہے۔
چیف جسٹس نے کہا کہ آئین انصاف کو معاشرے کی بنیاد بناتا ہے، اور اس بات کو یقینی بناتا ہے کہ کوئی بھی شخص قانون سے بالاتر نہ ہو۔
انہوں نے مزید کہا:
"ہمیں ایسا عدالتی نظام قائم کرنا ہوگا جو عوام دوست ہو، جہاں ہر شہری کو انصاف سستا، فوری اور منصفانہ انداز میں میسر ہو۔”
چیف جسٹس نے زور دیا کہ عدلیہ کی ذمہ داری ہے کہ وہ کمزور اور محروم طبقات کے حقوق کا تحفظ کرے، اور معاشرے میں قانون کی بالادستی کو ہر صورت برقرار رکھے۔
اپنے پیغام کے اختتام پر انہوں نے پوری قوم، خاص طور پر وکلا برادری اور عدالتی نظام سے وابستہ افراد کو یومِ آزادی کی مبارکباد پیش کی اور اس عزم کا اظہار کیا کہ عدلیہ آئندہ بھی انصاف کے قیام اور آئینی اقدار کے تحفظ کے لیے اپنا کردار ادا کرتی رہے گی۔
