تہران: پاکستان کی میزبانی میں جاری غیر علانیہ مذاکرات کے ثمرات سامنے آنے لگے۔ ایران کی وزارتِ خارجہ نے تصدیق کی ہے کہ امریکا نے تہران کے 14 نکاتی امن منصوبے پر اپنا باقاعدہ ردِعمل پاکستان کے حوالے کر دیا ہے، جسے اب ایرانی دارالحکومت میں زیرِ بحث لایا جا رہا ہے۔
ایرانی ترجمان اسماعیل بقائی نے اس سفارتی پیش رفت کی تفصیلات بتاتے ہوئے دو اہم نکات واضح کیے ہیں۔ ایران کا 14 نکاتی منصوبہ مکمل طور پر خطے میں جاری جنگ اور جارحیت کے خاتمے کے لیے ڈیزائن کیا گیا ہے۔
ان مذاکرات کو جوہری معاملے سے جوڑنا درست نہیں، کیونکہ اس مرحلے پر ایٹمی پروگرام (Nuclear Program) پر کوئی بات چیت نہیں ہو رہی۔
واشنگٹن اور تہران کے درمیان براہِ راست تعلقات نہ ہونے کے باعث پاکستان نے ایک بار پھر ‘سفارتی پل’ کا کردار ادا کیا ہے۔ امریکی جواب کا پاکستان کے ذریعے پہنچنا اس بات کا ثبوت ہے کہ دونوں ممالک موجودہ کشیدگی کو کم کرنے کے لیے پاکستان کی ثالثی اور رازداری پر بھروسہ کرتے ہیں۔ خطے میں "بیک چینل ڈپلومیسی” اب نتیجہ خیز مراحل میں داخل ہو چکی ہے۔
اسماعیل بقائی کا کہنا ہے کہ "ہم امریکی جواب کا بغور جائزہ لے رہے ہیں۔” سفارتی مبصرین کا خیال ہے کہ اگر ایران نے امریکی جواب کو مثبت پایا، تو اگلے چند دنوں میں مشرقِ وسطیٰ کے لیے کسی بڑے ‘امن معاہدے’ کا باقاعدہ اعلان متوقع ہے، جس کا سہرا پاکستان کے سر جائے گا۔
