کراچی :وزیراعلیٰ سندھ مراد علی شاہ نے کہا ہے کہ چین کے حالیہ دورے کے دوران سندھ میں سرمایہ کاری کے فروغ کے لیے چینی کمپنیوں کو دعوت دی گئی، جبکہ مختلف شعبوں میں حکومتی اور کاروباری سطح پر 34 معاہدوں اور مفاہمتی یادداشتوں پر دستخط ہوئے۔
سندھ کابینہ کے اجلاس سے خطاب کرتے ہوئے مراد علی شاہ نے کہا کہ دورہ چین کے دوران پن بجلی، سیلاب سے بچاؤ اور دریاؤں کے انتظام سے متعلق چینی حکام کے ساتھ تبادلہ خیال کیا گیا۔ انہوں نے کہا کہ سندھ میں زرعی شعبے کو جدید تقاضوں سے ہم آہنگ کرنے کے لیے بھی اقدامات جاری ہیں۔
وزیراعلیٰ سندھ نے بتایا کہ دورے کے دوران ووہان میں ایک زرعی کمپنی کے چیئرمین وانگ شیکائی سے ملاقات ہوئی، جبکہ شنگھائی میں منعقدہ کانفرنس میں بھی شرکت کی۔ کانفرنس میں مختلف شعبوں سے تعلق رکھنے والے تقریباً 400 مندوبین شریک ہوئے۔
