اسلام آباد: پاکستان کے سپارکو (SPARCO) نے اعلان کیا ہے کہ 7 اکتوبر 2025 کی رات کو آسمان پر سال 2025 کا پہلا سُپر مون دکھائی دے گا۔
سپارکو کے ترجمان کے مطابق، سُپر مون اس وقت ظاہر ہوتا ہے جب چاند زمین کے سب سے قریب ہوتا ہے، جس کے باعث چاند عام مکمل چاند کے مقابلے میں تقریباً 6.6 فیصد بڑا اور 13 فیصد زیادہ روشن نظر آتا ہے۔ اس مرتبہ چاند پاکستانی وقت کے مطابق رات 8 بجکر 47 منٹ پر طلوع ہوگا۔
یہ روشن چاند سورج غروب ہونے کے فوراً بعد مشرق کی سمت طلوع ہوگا اور طلوع آفتاب سے کچھ پہلے مغرب میں غروب ہو جائے گا۔ سپارکو نے مزید بتایا کہ اس سال کا سب سے روشن سُپر مون نومبر میں متوقع ہے، جب چاند زمین سے صرف 221,817 میل کے فاصلے پر ہوگا۔ نومبر اور دسمبر میں مزید دو سُپر مونز بھی دیکھے جا سکیں گے، جو بالترتیب 5 نومبر اور 5 دسمبر کو ہوں گے۔
خاص بات یہ ہے کہ اکتوبر کے اس سُپر مون کے دوران چاند سیارہ زحل کے قریب دکھائی دے گا، جو 6 اور 7 اکتوبر کی شام کو چاند کے مغربی جانب نظر آئے گا۔
