اسلام آباد :پاکستان کی وزارتِ خارجہ نے باضابطہ طور پر تصدیق کر دی ہے کہ پاکستان کو امریکہ اور ایران کے درمیان ہونے والے اہم سفارتی مذاکرات میں شرکت کی دعوت دے دی گئی ہے۔
سفارتی ذرائع کے مطابق یہ مذاکرات ترکیہ کے شہر استنبول میں منعقد ہو رہے ہیں، جہاں دونوں ممالک کے درمیان دیرینہ مسائل پر بات چیت متوقع ہے۔ دفترِ خارجہ کے حکام کا کہنا ہے کہ پاکستان کو اس عمل میں شامل کیا جانا خطے میں اس کی تزویراتی اہمیت کا اعتراف ہے۔ مذاکرات میں پاکستان کی نمائندگی کون کرے گا، اس حوالے سے حکومتِ سطح پر مشاورت جاری ہے۔
وزارتِ خارجہ کے مطابق وفد کی سربراہی اور نمائندگی کا فیصلہ آئندہ ایک سے دو روز میں متوقع ہے۔ تمام تر سفارتی سرگرمیاں استنبول میں مرکوز ہوں گی، جہاں پاکستان اپنا موقف پیش کرے گا۔
سفارتی ماہرین اس پیش رفت کو پاکستان کی بڑی کامیابی قرار دے رہے ہیں، جس سے ثابت ہوتا ہے کہ عالمی برادری تہران اور واشنگٹن کے درمیان پل کا کردار ادا کرنے کے لیے اسلام آباد پر بھروسہ کرتی ہے۔
