لانڈھی ایکسپورٹ زون میں کپڑوں کی فیکٹری میں خوفناک آگ، ایک عمارت منہدم، 7 مزدور زخمی

کراچی: لانڈھی ایکسپورٹ پراسیسنگ زون میں واقع کپڑوں کی ایک فیکٹری میں جمعرات کی صبح اچانک آگ بھڑک اٹھی، جس نے دیکھتے ہی دیکھتے تین عمارتوں کو اپنی لپیٹ میں لے لیا۔ آگ کی شدت اس قدر تھی کہ ایک عمارت مکمل طور پر منہدم ہو گئی۔

واقعے کے دوران جھلسنے والے 6 مزدوروں کو ریسکیو ٹیموں نے بروقت کارروائی کرتے ہوئے بحفاظت باہر نکالا اور فوری طور پر اسپتال منتقل کیا، جہاں انہیں ابتدائی طبی امداد فراہم کی جا رہی ہے۔

فائر بریگیڈ حکام کے مطابق، آگ کو تیسرے درجے کی شدت کی آتشزدگی قرار دیا گیا ہے۔ آگ پر قابو پانے کے لیے فائر بریگیڈ کی 16 گاڑیاں اور درجنوں اہلکار کئی گھنٹوں تک کارروائی میں مصروف رہے۔

دھوئیں کے گھنے بادل کئی کلومیٹر دور سے دیکھے گئے، جس کے باعث قریبی رہائشی علاقوں میں خوف و ہراس پھیل گیا۔

حکام کا کہنا ہے کہ آگ لگنے کی وجوہات جاننے کے لیے تحقیقات کا آغاز کر دیا گیا ہے، جبکہ فیکٹری انتظامیہ سے بھی ابتدائی معلومات حاصل کی جا رہی ہیں۔