لاہور: وزیراعلیٰ پنجاب مریم نواز شریف نے صوبے کے مختلف شہروں اور اضلاع میں بیوٹیفکیشن منصوبوں کی تکمیل کے لیے فروری سے مئی تک کا ہدف مقرر کیا ہے۔ ایک خصوصی اجلاس کی صدارت کرتے ہوئے وزیراعلیٰ نے پنجاب کے 39 اضلاع میں 132 بیوٹیفکیشن سکیموں کی تفصیلات کا جائزہ لیا اور متعلقہ حکام کو ان منصوبوں کی جلد اور بروقت تکمیل کے لیے ہدایات دیں۔
یہ منصوبے 16 ارب 90 کروڑ روپے کی لاگت سے مکمل ہوں گے اور ان کا مقصد پنجاب کے مختلف شہروں اور علاقوں کی خوبصورتی کو بہتر بنانا ہے۔ ان سکیموں میں لاہور، سرگودھا، بہاولپور، گوجرانوالہ، راولپنڈی، فیصل آباد، ملتان اور ساہیوال جیسے بڑے شہروں کی سڑکوں، بازاروں، تاریخی مقامات اور دیگر اہم علاقوں کی تجدید شامل ہے۔
وزیراعلیٰ مریم نواز شریف نے کہا کہ بیوٹیفکیشن پراجیکٹس میں قدیم دروازوں کی بحالی، سڑکوں پر رنگین ٹائلز کی تنصیب، فوارے اور مصنوعی آبشاروں کا اضافہ، اور مرکزی بازاروں میں خوبصورت گرین بیلٹس بنانے کی تجویز ہے۔ انہوں نے یہ بھی کہا کہ ان پراجیکٹس کی نگرانی کے لیے ایک ڈیش بورڈ بنایا جائے گا تاکہ ان کی پیش رفت پر نظر رکھی جا سکے اور کسی بھی رکاوٹ کو فوراً حل کیا جا سکے۔
مریم نواز شریف نے کہا، "ہمارا مقصد ہر شہر، ہر قصبہ اور ہر ضلع کو خوبصورت بنانا ہے تاکہ عوام کو بہتر ماحول فراہم کیا جا سکے۔” انہوں نے عوامی سہولت کو بھی اہمیت دی اور کہا کہ بیوٹیفکیشن کے دوران عوام کو کسی قسم کی مشکلات کا سامنا نہیں ہوگا۔
اس کے علاوہ، مخصوص اہداف بھی مقرر کیے گئے ہیں جن کے تحت مختلف شہروں میں بیوٹیفکیشن منصوبے جلد مکمل ہوں گے، جیسے بہاولپور میں بابا فرید گیٹ کی بحالی اور فیصل آباد میں 121 سال قدیم گھنٹہ گھر کی تجدید۔
وزیراعلیٰ مریم نواز شریف کا کہنا ہے کہ یہ منصوبے پنجاب میں ترقی کی نئی راہیں کھولیں گے اور شہری زندگی کو بہتر بنائیں گے۔
