کراچی :سٹیٹ بینک آف پاکستان نے اعلان کیا ہے کہ گزشتہ ہفتے کے دوران اس کے زرمبادلہ ذخائر میں 3 کروڑ 40 لاکھ ڈالر کا اضافہ ہوا ہے۔ اس اضافے کے بعد اسٹیٹ بینک کے کل ذخائر 14 ارب 33 کروڑ 63 لاکھ ڈالر تک پہنچ گئے ہیں۔
ملک کے مجموعی زرمبادلہ ذخائر، جن میں کمرشل بینکوں کے ذخائر بھی شامل ہیں، اب 19 ارب 68 کروڑ ڈالر کی سطح پر ہیں۔ کمرشل بینکوں کے ذخائر 5 ارب 34 کروڑ 46 لاکھ ڈالر ریکارڈ کیے گئے ہیں۔
ماہرین معاشیات کے مطابق، زرمبادلہ ذخائر میں یہ اضافہ ملکی معیشت کے لیے مثبت اشارہ ہے اور اس سے روپے کی قدر میں استحکام آنے کی توقع ہے۔ اسٹیٹ بینک نے کہا ہے کہ اگر ترسیلات زر اور برآمدات میں اضافہ جاری رہا تو ذخائر کی صورت حال مزید بہتر ہو سکتی ہے۔
