صدر اور وزیراعظم کا پشاور میں ایف سی ہیڈکوارٹرز پر دہشت گردوں کے حملے کی مذمت، سکیورٹی فورسز کی بروقت کارروائی کو سراہا

اسلام آباد: پاکستان کے صدر آصف علی زرداری اور وزیراعظم محمد شہباز شریف نے پشاور میں ایف سی ہیڈکوارٹرز پر ہونے والے دہشت گردوں کے حملے کی شدید مذمت کی ہے اور سکیورٹی فورسز کی بروقت کارروائی کو سراہا جس کی بدولت ایک بڑے سانحے سے بچا گیا۔

صدر مملکت آصف علی زرداری نے اس حملے کو "فتنہ الخوارج” کی جانب سے پاکستان کے خلاف کی جانے والی بزدلانہ کارروائی قرار دیتے ہوئے کہا کہ یہ دہشت گردی بیرونی حمایت حاصل کرنے والے عناصر کی جانب سے کی گئی تھی۔ انہوں نے دہشت گردی کے مکمل خاتمے کو اپنی حکومت کی اولین ترجیح قرار دیتے ہوئے شہداء کے لواحقین سے دلی ہمدردی کا اظہار کیا اور زخمیوں کی جلد صحت یابی کے لیے دعائیں کیں۔

صدر زرداری نے سکیورٹی فورسز اور پولیس کی بروقت کارروائی کو سراہتے ہوئے کہا کہ ان کی جرات مندانہ کارروائی نے بڑی تباہی کو روکا۔ انہوں نے مزید کہا کہ پاکستان اپنی سرزمین پر دہشت گردی کو کسی صورت برداشت نہیں کرے گا اور ایسے حملوں کا جواب مضبوطی سے دیا جائے گا۔

وزیراعظم محمد شہباز شریف نے بھی اس حملے کی مذمت کرتے ہوئے زخمیوں کو فوری طبی امداد فراہم کرنے کی ہدایت کی۔ وزیراعظم نے کہا کہ حکومت پاکستان ملک سے دہشت گردی کے مکمل خاتمے کے لیے پرعزم ہے اور واقعے کے ذمہ داروں کو جلد از جلد پکڑ کر کیفر کردار تک پہنچایا جائے گا۔ انہوں نے کہا، "ہم دہشت گردوں کے مذموم عزائم کو خاک میں ملا دیں گے، اور پاکستان کی سالمیت پر حملہ کرنے والے کسی بھی شخص کو نہیں چھوڑا جائے گا۔”

خیال  رہے کہ پشاور میں ایف سی ہیڈکوارٹرز پر تین دہشت گردوں نے حملہ کیا تھا۔ سکیورٹی فورسز کی بروقت کارروائی کے باعث ایک خودکش بمبار گیٹ پر ہی پھٹ گیا، جبکہ دو حملہ آوروں کو ایف سی کے جوانوں نے گولیاں مار کر ہلاک کر دیا۔

وفاقی وزیر داخلہ محسن نے اس موقع پر کہا کہ فیڈرل کانسٹیبلری کے جری جوانوں نے بہادری سے دہشت گردوں کے حملے کو ناکام بنایا اور جام شہادت نوش کرنے والے تین ایف سی جوانوں کو خراجِ عقیدت پیش کیا۔ انہوں نے مزید کہا کہ زخمیوں کو علاج معالجے کی بہترین سہولتیں فراہم کی جائیں گی۔