صدر اور وزیراعظم کی جانب سے سعودی عرب کوقومی دن پر دلی مبارکباد پیش 

اسلام آباد: صدرِ مملکت آصف علی زرداری اور وزیراعظم شہباز شریف نے سعودی عرب کے 93ویں قومی دن کے موقع پر سعودی قیادت اور عوام کو دلی مبارکباد پیش کی ہے۔ دونوں رہنماؤں نے اپنے الگ الگ پیغامات میں پاکستان اور سعودی عرب کے مابین گہرے، تاریخی اور اسٹریٹجک تعلقات کو سراہا اور انہیں مزید فروغ دینے کے عزم کا اظہار کیا۔

صدر آصف علی زرداری نے کہا کہ پاکستان اور سعودی عرب کے تعلقات باہمی اعتماد، خلوص اور اخوت پر مبنی ہیں۔ انہوں نے اس بات پر زور دیا کہ خانہ کعبہ اور مسجد نبوی کی موجودگی دونوں ممالک کو ایک روحانی بندھن میں جوڑتی ہے۔ صدر نے دفاع اور سکیورٹی کے میدان میں تعاون کو خطے میں امن و استحکام کے لیے نہایت اہم قرار دیا۔

وزیراعظم شہباز شریف نے اپنے پیغام میں سعودی فرمانروا شاہ سلمان بن عبدالعزیز، ولی عہد و وزیراعظم شہزادہ محمد بن سلمان اور سعودی عوام کو قومی دن کی مبارکباد دی۔ انہوں نے کہا کہ حالیہ دورۂ ریاض کے دوران سعودی حکومت کی جانب سے ملنے والی عزت اور محبت پاکستان کے لیے باعثِ فخر ہے۔

وزیراعظم نے کہا کہ پاکستان اور سعودی عرب کے تعلقات دین، تاریخ اور بھائی چارے کی بنیاد پر قائم ہیں، جو وقت کے ساتھ مزید مستحکم ہوئے ہیں۔ انہوں نے شہزادہ محمد بن سلمان کی قیادت میں سعودی عرب کی تیزی سے ترقی کو سراہتے ہوئے کہا کہ سعودی عرب آج عالمی سطح پر ایک باوقار ملک کے طور پر ابھر رہا ہے۔

اپنے پیغام میں وزیراعظم نے 2025 میں بھارت کے ساتھ کشیدہ حالات کے دوران سعودی عرب کی حمایت پر شکریہ ادا کیا اور کہا کہ پاکستان اس بھائی چارے کو کبھی نہیں بھولے گا۔ انہوں نے سعودی عرب کے معاشی تعاون اور وہاں مقیم لاکھوں پاکستانیوں کو دونوں ممالک کے مضبوط تعلقات کی عملی مثال قرار دیا۔

وزیراعظم نے آخر میں اس دیرینہ دوستی کو مزید مضبوط بنانے کے عزم کا اظہار کرتے ہوئے دعا کی کہ اللہ تعالیٰ سعودی عرب کو مزید ترقی، خوشحالی اور عظمت عطا فرمائے۔