تل ابیب/واشنگٹن : مشرقِ وسطیٰ میں جاری شدید تناؤ کے دوران ایرانی قیادت کی جانب سے ایک بڑی پالیسی تبدیلی کی بازگشت سنائی دے رہی ہے۔ اسرائیلی میڈیا نے اپنی ایک خصوصی رپورٹ میں دعویٰ کیا ہے کہ ایران کے رہبرِ اعلیٰ مجتبیٰ خامنہ ای نے امریکہ کے ساتھ مذاکرات اور نئے معاہدے کے لیے گرین سگنل دے دیا ہے۔
رپورٹ کے مطابق، رہبرِ اعلیٰ نے موجودہ علاقائی صورتحال، بالخصوص اسرائیل کے ساتھ براہِ راست تصادم کے خطرات اور آبنائے ہرمز کی نازک صورتحال کے پیشِ نظر واشنگٹن کے ساتھ "حقیقت پسندانہ” سفارت کاری اپنانے پر زور دیا ہے۔ اس ہدایت کا مقصد ایران پر بڑھتے ہوئے معاشی اور فوجی دباؤ کو کم کرنے کے لیے براہِ راست یا بالواسطہ رابطوں کا آغاز کرنا ہے۔
اسرائیلی اخبار نے انکشاف کیا ہے کہ ایرانی قیادت کے اندر سخت گیر (Hardliners) اور سفارتی دھڑوں (Diplomatic Factions) کے درمیان طویل عرصے سے اختلافات موجود ہیں۔ مجتبیٰ خامنہ ای کے اس مبینہ بیان کو مذاکرات کے حامی گروہ کی بڑی کامیابی اور ان کی پوزیشن کی مضبوطی کے طور پر دیکھا جا رہا ہے، جو ایران کو عالمی تنہائی سے نکالنا چاہتے ہیں۔
اگرچہ تہران نے تاحال ان دعوؤں کی باضابطہ تصدیق نہیں کی، تاہم سفارتی ماہرین کا کہنا ہے کہ یہ پیش رفت مشرقِ وسطیٰ کے لیے "گیم چینجر” ثابت ہو سکتی ہے۔ یہ خبر ایک ایسے وقت میں سامنے آئی ہے جب پاکستان نے بھی حال ہی میں دونوں ممالک کے درمیان مذاکرات کی میزبانی کے لیے اپنی خدمات پیش کی ہیں۔
