واشنگٹن: امریکا میں وسط مدتی انتخابات کے ابتدائی نتائج سامنے آگئے، جن کے مطابق ڈیموکریٹک پارٹی نے سینیٹ اور ایوانِ نمائندگان کی متعدد اہم نشستوں پر کامیابی حاصل کرلی ہے، جبکہ دونوں ایوانوں میں بھی ڈیموکریٹس کو ابتدائی برتری حاصل ہے۔
امریکی میڈیا کے مطابق مختلف ریاستوں میں پولنگ کا وقت ختم ہونے کے بعد ووٹوں کی گنتی جاری ہے۔ ابتدائی نتائج کے مطابق سینیٹ میں ڈیموکریٹس نے 45 جبکہ ریپبلکنز نے 36 نشستیں حاصل کی ہیں۔ اسی طرح ایوانِ نمائندگان میں ڈیموکریٹک امیدوار 113 اور ریپبلکن امیدوار 62 نشستوں پر کامیاب ہوئے ہیں۔
نتائج کے مطابق ریاست ورجینیا سے ڈیموکریٹک سینیٹر مارک وارنر نے ریپبلکن امیدوار برٹ میزوساوا کو شکست دے کر دوبارہ سینیٹ کی نشست جیت لی۔ اس کامیابی کے بعد وہ سینیٹ میں اپنی چوتھی مدت کے لیے منتخب ہوگئے ہیں۔
فلوریڈا کے 20ویں کانگریشنل ڈسٹرکٹ سے ڈیموکریٹک رہنما ڈیبی واسرمین شلٹز نے کامیابی حاصل کرکے اپنی نشست برقرار رکھی، جبکہ کینٹکی کے تیسرے کانگریشنل ڈسٹرکٹ سے مورگن میک گاروی بھی دوبارہ منتخب ہوگئے۔
ریاست جارجیا میں ڈیموکریٹک امیدوار جیسمین کلارک نے 13ویں کانگریشنل ڈسٹرکٹ سے کامیابی حاصل کی، جبکہ نیکیما ولیمز نے پانچویں کانگریشنل ڈسٹرکٹ سے ریپبلکن امیدوار جان سالویسن کو شکست دے دی۔
فلوریڈا کے دسویں کانگریشنل ڈسٹرکٹ سے الیگزینڈرو فراسٹ بلا مقابلہ دوبارہ منتخب ہوگئے، جبکہ 23ویں کانگریشنل ڈسٹرکٹ سے لوئس فرینکل نے بھی کامیابی حاصل کی۔ اسی طرح جارجیا کے چھٹے کانگریشنل ڈسٹرکٹ سے لوسی میک باتھ اپنی نشست برقرار رکھنے میں کامیاب رہیں۔
دوسری جانب ریپبلکن امیدوار بھی مختلف حلقوں میں کامیاب ہوئے۔ کینٹکی کے پانچویں کانگریشنل ڈسٹرکٹ سے ہال راجرز دوبارہ منتخب ہوئے، جبکہ فلوریڈا کے 19ویں کانگریشنل ڈسٹرکٹ سے جم شوارٹزل نے کامیابی حاصل کی۔
ادھر الاباما، ڈیلاویئر، فلوریڈا، الینوائے، میساچوسٹس، مین، مسی سپی، نیو ہیمپشائر، نیو میکسیکو، ٹیکساس، ساؤتھ ڈکوٹا اور وائیومنگ سمیت متعدد ریاستوں میں پولنگ مکمل ہونے کے بعد ووٹوں کی گنتی جاری ہے۔
انتخابی عمل مکمل ہونے اور حتمی نتائج کے اعلان کے بعد امریکی کانگریس کے دونوں ایوانوں میں ڈیموکریٹس اور ریپبلکنز کی نشستوں کی حتمی تعداد واضح ہوجائے گی۔
