کیلیفورنیا: واٹس ایپ صارفین کے لیے ایک اہم فیچر متعارف کرانے جا رہا ہے جس کے ذریعے آپ کو کالز اور چیٹس کے لیے اب اپنے یا دوسرے صارف کے فون نمبر کی ضرورت نہیں پڑے گی۔ واٹس ایپ کی حالیہ رپورٹ کے مطابق، مستقبل میں صارفین اپنے یوزر نیم کے ذریعے دوسرے افراد کو تلاش کر سکیں گے اور ان سے رابطہ کر سکیں گے، جس سے کانٹیکٹ کی تفصیلات شیئر کرنے کی ضرورت ختم ہو جائے گی۔
یہ فیچر واٹس ایپ کے نئے بیٹا ورژن میں متعارف کرایا گیا ہے اور اس کا مقصد صارفین کو اضافی پرائیویسی اور سیکیورٹی فراہم کرنا ہے۔ اس فیچر کے تحت، آپ کسی دوسرے شخص کے فون نمبر کے بجائے ان کا یوزر نیم ٹائپ کر کے انہیں سرچ کر سکیں گے، اور پھر وائس یا ویڈیو کالز کرنے کے قابل ہوں گے، مگر یہ اس بات پر منحصر ہوگا کہ دوسرے شخص کی پرائیویسی سیٹنگز کیا ہیں۔
اس کے علاوہ، آپ دوسرے فرد کی پروفائل فوٹو بھی دیکھ سکیں گے، لیکن یہ بھی ان کی پرائیویسی سیٹنگز پر منحصر ہوگا۔ یہ فیچر ان صارفین کے لیے خاص طور پر مفید ہوگا جو اپنی پرائیویسی کو اہمیت دیتے ہیں اور نہیں چاہتے کہ ان کا فون نمبر دوسرے افراد کے ساتھ شیئر ہو۔
یہ نیا فیچر فی الحال واٹس ایپ کے بیٹا صارفین کے لیے دستیاب نہیں ہے اور اس پر کام جاری ہے۔ ابھی یہ واضح نہیں ہے کہ یوزر نیم کا فارمیٹ اور دیگر کنٹرولز کس طرح ہوں گے، مگر یہ تبدیلی واٹس ایپ کے رابطے کے تجربے کو زیادہ محفوظ اور پرائیویٹ بنانے میں مدد دے گی۔
اگر یہ فیچر مکمل طور پر متعارف کرایا جاتا ہے، تو واٹس ایپ کے صارفین کے لیے یہ ایک بڑی سہولت ثابت ہو گا اور پرائیویسی کے حوالے سے ایک اہم قدم ہوگا.
