واشنگٹن: امریکی صدر ڈونلڈ ٹرمپ کی جانب سے ایران کے لیے ایک بار پھر انتہائی سخت موقف سامنے آیا ہے، جس میں انہوں نے تہران کو آخری وارننگ دیتے ہوئے فوری فیصلے کا مطالبہ کیا ہے۔
امریکی صدر نے واضح الفاظ میں کہا ہے کہ ایران کے پاس سوچنے کا وقت اب ختم ہو چکا ہے اور اسے فوری طور پر حرکت میں آنا ہوگا۔ انہوں نے دھمکی آمیز لہجے میں کہا کہ اگر ایران نے فوری طور پر نیا معاہدہ تسلیم نہ کیا تو اسے ایسے سنگین نتائج بھگتنا ہوں گے کہ خطے میں ان کے لیے کچھ باقی نہیں رہے گا۔
سفارتی ماہرین کے مطابق صدر ٹرمپ کا یہ بیان ایران پر امریکی شرائط کو قبول کرنے کے لیے ڈرامائی انداز میں دباؤ بڑھانے کی کڑی ہے، جس سے آنے والے دنوں میں دونوں ممالک کے درمیان جاری تناؤ کے خطرناک حد تک بڑھنے کے امکانات واضح ہو گئے ہیں۔
