راولپنڈی: سکیورٹی فورسز نے انٹیلی جنس معلومات پر مبنی ایک انتہائی منظم اور کامیاب ترین آپریشن کے دوران ‘فتنہ الہندوستان’ سے تعلق رکھنے والے 14 دہشت گردوں کو جہنم واصل کر دیا ہے ۔ پاک فوج کے شعبہ تعلقات عامہ (آئی ایس پی آر) کے مطابق، یہ معرکہ ضلع بسیمہ کے علاقے نال میں اس وقت پیش آیا جب خفیہ اداروں نے دہشت گردوں کی جانب سے مقامی پولیس سٹیشنوں اور بینکوں پر بیک وقت بڑے حملوں کی ہولناک منصوبہ بندی کو وقت سے پہلے بریک کر دیا۔ سکیورٹی فورسز نے فوری رسپانس دیتے ہوئے بروقت کارروائی کی اور دشمن کے ناپاک عزائم مٹی میں ملا دیے۔
آئی ایس پی آر کے مطابق، کارروائی کے دوران فورسز نے انتہائی پیشہ ورانہ حکمتِ عملی کے تحت دہشت گردوں کی نقل و حرکت کو مؤثر انداز میں روکا اور ان کا گھیراؤ کر کے انہیں بھرپور نشانہ بنایا۔ فائرنگ کے اس شدید تبادلے میں 14 دہشت گرد موقع پر ہی ڈھیر ہو گئے، جبکہ فورسز نے کارروائی کے دوران دہشت گردوں کے زیرِ استعمال 4 گاڑیاں اور بھاری مقدار میں موجود بارودی مواد بھی مکمل طور پر تباہ کر دیا۔ اس کڑے معرکے میں پاک فوج کے بہادر لانس حوالدار محمد عباس نے شجاعت کی اعلیٰ مثال قائم کرتے ہوئے وطنِ عزیز کے امن پر اپنی جان نچھاور کی اور جامِ شہادت نوش کیا۔
آئی ایس پی آر کا کہنا ہے کہ علاقے میں روپوش بھارتی سرپرستی میں کام کرنے والے بقیہ دہشت گردوں کے مکمل خاتمے کے لیے سکیورٹی فورسز کا کلیئرنس آپریشن تاحال پوری قوت سے جاری ہے۔ ترجمان نے واضح کیا کہ بیرونی پشت پناہی سے ملک میں بدامنی پھیلانے والے اس کینسر کے مکمل خاتمے تک سکیورٹی فورسز اور قانون نافذ کرنے والے اداروں کی یہ مہم پوری طاقت کے ساتھ بلا تعطل جاری رہے گی۔
