اسلام آباد: وزیراعظم شہباز شریف نے قومی اقتصادی کونسل کے اجلاس سے خطاب کرتے ہوئے کہا ہے کہ پاکستان کو اس وقت معاشی استحکام اور دہشتگردی کے سنگین چیلنجز کا سامنا ہے، جن سے نمٹنے کے لیے قومی اتحاد اور مربوط کوششیں ناگزیر ہیں۔
انہوں نے کہا کہ وفاق اور صوبوں کے درمیان بجٹ اور اقتصادی فیصلوں پر تفصیلی مشاورت ہوئی، جس کے بعد تمام فیصلے اتفاقِ رائے سے ملک کے بہترین مفاد میں کیے گئے۔ وزیراعظم کے مطابق اس عمل میں تمام وزرائے اعلیٰ نے بھرپور تعاون کیا۔
وزیراعظم نے بتایا کہ صوبوں نے بین الاقوامی مالیاتی فنڈ پروگرام پر عملدرآمد جاری رکھنے کے عزم کا اظہار کیا ہے، جو معاشی استحکام کے لیے اہم ہے۔
انہوں نے کہا کہ حکومت کی بہتر حکمت عملی کے باعث معیشت میں اس وقت میکرو سطح پر استحکام موجود ہے اور تیل کی فراہمی میں کسی بڑے بحران سے بچاؤ ممکن ہوا۔ ان کے مطابق عالمی قیمتوں میں اتار چڑھاؤ کے باوجود عوام کو ریلیف فراہم کیا گیا اور پٹرولیم مصنوعات کی دستیابی یقینی بنائی گئی۔
دہشتگردی کے حوالے سے وزیراعظم نے کہا کہ یہ ایک بڑا قومی چیلنج ہے، جس کے خاتمے کے لیے یکسوئی، وسائل اور قومی اتحاد ضروری ہیں۔ انہوں نے سکیورٹی فورسز کی قربانیوں کو سراہتے ہوئے کہا کہ پوری قوم اس جنگ میں متحد ہے۔
وزیراعظم نے زور دیا کہ قومی فیصلے ٹیم ورک کے ذریعے ہی بہتر نتائج دیتے ہیں اور تمام اداروں کے درمیان تعاون ملک کے استحکام کے لیے اہم ہے۔
