پاک بحریہ کا شمالی بحیرۂ عرب میں زمین سے فضا میں مار کرنے والے میزائل کا کامیاب لائیو فائر تجربہ

پاکستان بحریہ نے شمالی بحیرۂ عرب میں زمین سے فضا میں مار کرنے والے جدید ایف ایم 90 این ای آر میزائل کا کامیاب لائیو ویپن فائرنگ مظاہرہ کیا ہے، جس سے بحریہ کی جنگی صلاحیت اور آپریشنل تیاری کا بھرپور اظہار ہوا ہے۔

پاک فوج کے شعبہ تعلقات عامہ (آئی ایس پی آر) کے مطابق اس فائر پاور مظاہرے کا مقصد پاک بحریہ کی دفاعی تیاری اور حربی مہارت کو جانچنا تھا۔ تجربے کے دوران میزائل نے انتہائی تیزی سے فضائی اہداف کو کامیابی سے نشانہ بنایا، جو بحریہ کی جدید دفاعی صلاحیتوں کا واضح ثبوت ہے۔

اس موقع پر کمانڈر پاکستان فلیٹ، ریئر ایڈمرل عبدالمُنیب نے فائرنگ کے مظاہرے کا مشاہدہ کیا اور پاک بحریہ کی آپریشنل تیاری پر مکمل اطمینان کا اظہار کیا۔ انہوں نے افسران اور جوانوں کی پیشہ ورانہ مہارت، عزم اور لگن کو سراہا۔

کمانڈر پاکستان فلیٹ نے اس عزم کا اعادہ کیا کہ پاک بحریہ ملک کے سمندری دفاع اور قومی بحری مفادات کے تحفظ کے لیے ہر وقت تیار ہے اور کسی بھی ممکنہ چیلنج کا مؤثر انداز میں مقابلہ کرنے کی بھرپور صلاحیت رکھتی ہے۔

آئی ایس پی آر کے مطابق یہ کامیاب میزائل تجربہ پاک بحریہ کی جدید دفاعی تیاریوں کی ایک اور نمایاں مثال ہے، جو قومی سمندری حدود کے تحفظ اور بیرونی خطرات کے سدباب میں اہم کردار ادا کرتی ہے۔