کراچی : پاکستان اسٹاک ایکسچینج میں مسلسل کئی ہفتوں کی تیزی کے بعد آج ایک بڑا ‘کریکشن’ (Correction) دیکھا گیا۔ کے ایس ای 100 انڈیکس، جو گزشتہ دنوں ریکارڈ سطح پر تھا، آج 4,687 پوائنٹس کی غیر معمولی کمی کے ساتھ 149,178 پر بند ہوا۔آج کے کاروبار کے دوران مارکیٹ میں شدید اتار چڑھاؤ رہا۔ ابتدائی سیشن میں معمولی مندی کے بعد، دوسرے سیشن میں فروخت کا سیلاب آ گیا جس نے انڈیکس کو 1 لاکھ 50 ہزار کی اہم نفسیاتی حد سے نیچے دھکیل دیا۔
سٹیٹ بینک کی جانب سے مانیٹری پالیسی میں انٹرسٹ ریٹ کو 12% پر برقرار رکھنے کے فیصلے نے انویسٹرز کی امیدوں پر پانی پھیر دیا، جو شرح میں کمی کی توقع کر رہے تھے۔ آئی ایم ایف کے نئے ریویو اور نجکاری کے عمل میں سست روی نے بڑے ہاؤسز کو محتاط کر دیا ہے۔
ماہرین کے مطابق مارکیٹ کافی عرصے سے ‘اوور باؤٹ’ (Overbought) پوزیشن میں تھی، اس لیے ایک بڑی گراوٹ ناگزیر تھی۔
تجزیہ کاروں کا کہنا ہے کہ اگر مارکیٹ نے اگلے دو روز میں 1 لاکھ 48 ہزار کی سطح کو برقرار نہ رکھا تو مندی کا یہ سلسلہ مزید دراز ہو سکتا ہے۔ تاہم، موجودہ قیمتوں پر کچھ حصص کی خریداری دوبارہ شروع ہونے کا امکان بھی موجود ہے۔
