میکسیکو:فیفا ورلڈ کپ میں شائقین کو ایک بار پھر سنسنی خیز مقابلے دیکھنے کو ملے، جہاں انگلینڈ اور کولمبیا نے کامیابیاں سمیٹ لیں جبکہ پرتگال اور کانگو کے درمیان میچ برابر رہا۔
گروپ کے ایک اہم میچ میں کولمبیا نے ازبکستان کو ایک کے مقابلے میں تین گول سے شکست دے کر ایونٹ میں اپنی پوزیشن مستحکم کر لی۔ کولمبیا نے میچ کے آغاز سے ہی جارحانہ کھیل پیش کیا اور حریف ٹیم کو دباؤ میں رکھا۔
دوسری جانب انگلینڈ نے کروشیا کے خلاف شاندار کھیل کا مظاہرہ کرتے ہوئے دو کے مقابلے میں چار گول سے کامیابی حاصل کی۔ انگلش ٹیم نے میچ کے دوران متعدد خوبصورت حملے کیے اور اہم فتح اپنے نام کی۔
اسٹار فٹبالر کرسٹیانو رونالڈو اپنی ٹیم پرتگال کو کانگو کے خلاف فتح نہ دلا سکے اور دونوں ٹیموں کے درمیان مقابلہ ایک، ایک گول سے برابر رہا۔ میچ میں دونوں جانب سے جارحانہ کھیل دیکھنے میں آیا تاہم کوئی بھی ٹیم فیصلہ کن برتری حاصل نہ کر سکی۔
ایک اور دلچسپ مقابلے میں گھانا نے پاناما کو صفر کے مقابلے میں ایک گول سے شکست دے دی۔ گھانا کی جانب سے فیصلہ کن گول میچ کے آخری لمحات میں کیا گیا، جس کے بعد ٹیم اور شائقین خوشی سے جھوم اٹھے۔
