اسلام آباد:پاکستان نے پاکستانی خصوصی اقتصادی زون میں پاک بحریہ کی مشقوں کے دوران بھارتی بحری جہاز کی مبینہ مداخلت پر بھارت سے باضابطہ احتجاج کیا ہے۔
ترجمان دفتر خارجہ کے مطابق پاک بحریہ کی سی سپارک 26 مشقیں یکم ستمبر سے پاکستانی خصوصی اقتصادی زون میں جاری ہیں۔ 7 ستمبر سے بھارتی بحری جہاز اور ہیلی کاپٹر کی جانب سے مشقوں میں مداخلت کی کوششیں کی جاتی رہیں۔
ترجمان کے مطابق پاک بحریہ نے بھارتی بحری جہاز کو متعدد مرتبہ خبردار کیا، تاہم آئی این ایس کولکتہ مبینہ طور پر اشتعال انگیز سرگرمیوں سے باز نہیں آیا۔
دفتر خارجہ کا کہنا ہے کہ بھارتی بحری جہاز کی سرگرمیاں دوطرفہ معاہدے کی کھلی خلاف ورزی ہیں، جس پر پاکستان نے بھارتی حکومت کے سامنے باضابطہ احتجاج ریکارڈ کرایا ہے۔
