اسلام آباد : وفاقی دارالحکومت کے شہریوں کے لیے جدید، سستی اور ماحول دوست سفری سہولیات کی فراہمی کے سلسلے میں ایک اور اہم سنگِ میل عبور کر لیا گیا ہے۔ وفاقی وزیر داخلہ محسن نقوی نے اسلام آباد میں الیکٹرک بسوں کے پہلے جدید ڈپو اور ‘اسٹیٹ آف دی آرٹ’ چارجنگ سینٹر کا باقاعدہ افتتاح کر دیا ہے۔
افتتاح کے موقع پر وفاقی وزیر داخلہ نے الیکٹرک بس میں خود سفر کیا اور مسافروں کے لیے فراہم کردہ سہولیات اور بسوں کے معیار کا تفصیلی جائزہ لیا۔ انہوں نے منصوبے کو عالمی معیار کے مطابق اور بروقت مکمل کرنے پر متعلقہ ٹیم کی کارکردگی کو سراہا۔
حکومت کی جانب سے اسلام آباد کے ٹرانسپورٹ سسٹم کو جدید خطوط پر استوار کرنے کے لیے درج ذیل اہداف مقرر کیے گئے ہیں۔
اس وقت روزانہ 1 لاکھ 25 ہزار شہری الیکٹرک بسوں سے مستفید ہو رہے ہیں۔ حکومت نے اس ہدف کو دوگنا کر کے 2 لاکھ 50 ہزار روزانہ تک بڑھانے کا فیصلہ کیا ہے۔ ان بسوں کے ذریعے شہر میں فضائی آلودگی (Smog) میں نمایاں کمی آئے گی اور پیٹرولیم مصنوعات پر انحصار کم ہوگا۔ نیا چارجنگ سینٹر جدید ترین ٹیکنالوجی سے لیس ہے جو بسوں کی تیز رفتار چارجنگ اور بہتر مینٹیننس کو یقینی بنائے گا۔
