کراچی: چیئرمین نئی بات میڈیا گروپ، پروفیسر ڈاکٹر چودھری عبدالرحمان نے ایک تقریب سے خطاب کرتے ہوئے کہا ہے کہ پاکستان 75 سال سے زائد عرصہ گزرنے کے باوجود ترقی کے درست راستے پر نہیں چل سکا اور معیارِ زندگی مسلسل کم ہوتا جا رہا ہے۔
ڈاکٹر عبدالرحمان نے کہا کہ ملک میں تعلیم، صحت اور دیگر بنیادی شعبے تنزلی کے شکار ہیں، اور نوجوان نسل اکثر فوری دولت کے حصول کے چکر میں رہتی ہے جس سے محنت اور لگن کی کمی پیدا ہوئی ہے۔ انہوں نے پرائیویٹ سیکٹر کی کوششوں کو سراہا مگر کہا کہ قومی سطح پر کردار سازی کے لیے مضبوط رول ماڈلز کی ضرورت ہے۔
انہوں نے مزید کہا کہ پوری دنیا کے لیڈرز ایمانداری پر کم یقین رکھتے ہیں، اور پاکستان میں بھی قومی ایشوز پر کھلی اور شفاف بحث ضروری ہے۔ ڈاکٹر عبدالرحمان نے وضاحت کی کہ بہترین رول ماڈل حضرت محمد ﷺ ہیں اور قرآن مجید میں زندگی کے تمام مسائل کے حل موجود ہیں۔
انہوں نے کراچی کے شہری و تعلیمی حالات پر بھی تشویش کا اظہار کیا اور کہا کہ کبھی روشنیوں کا شہر کہلانے والا کراچی آج مایوس کن صورتحال میں ہے۔ ملک کے 450 کالجز لاکھوں طلبہ کو تعلیم دے رہے ہیں، مگر حکمرانی کے ناقص نظام کی وجہ سے یہ تعلیمی ادارے اپنی مکمل صلاحیت کے مطابق خدمات فراہم نہیں کر رہے۔
ڈاکٹر عبدالرحمان نے کہا کہ موجودہ گورننس ماڈل اچھے اور شایسته افراد کو سامنے آ کر بہتر کام کرنے کی اجازت نہیں دیتا، اور پاکستان ٹرانسپیرنسی انڈیکس میں 173 ویں نمبر پر ہے۔ انہوں نے زور دیا کہ قوم کو اپنے رول ماڈلز کو درست کرنے کی ضرورت ہے تاکہ نوجوان نسل میں محنت، ایمانداری اور لگن کی قدروں کو فروغ دیا جا سکے اور ملک ترقی کی راہ پر گامزن ہو۔
