شاہراہِ بھٹو کراچی کے لیے تحفہ ہے، شہر کی اصل ترقی پیپلز پارٹی کا طرۂ امتیاز ہے؛بلاول بھٹو زرداری

کراچی:پاکستان پیپلز پارٹی کے چیئرمین بلاول بھٹو زرداری نے کراچی میں شاہراہِ بھٹو کی افتتاحی تقریب سے خطاب کرتے ہوئے کہا ہے کہ کراچی پورے پاکستان کا معاشی مرکز ہے، جہاں دوسرے صوبوں سے لوگ کاروبار کی غرض سے آتے ہیں اور ہم کھلے دل سے سب کو یہاں کام کرنے کی دعوت دیتے ہیں۔ انہوں نے واضح کیا کہ کراچی کی تاریخ گواہ ہے کہ جب بھی اس شہر میں بڑے ترقیاتی منصوبے بنے، وہ صرف اور صرف پیپلز پارٹی نے ہی بنائے۔

بلاول بھٹو زرداری نے اپنے خطاب میں انفراسٹرکچر اور صحت کے شعبوں کا خاص ذکر کرتے ہوئے کہا کہ شاہراہِ بھٹو اور لیاری ایکسپریس وے جیسے منصوبے شہر کی رونقوں کو بحال کرنے کے لیے ہماری حکومت کے اقدامات کا ثبوت ہیں۔ اسی طرح، آج کراچی میں اگر شہریوں کو عالمی معیار کا مفت علاج مل رہا ہے تو وہ بھی پیپلز پارٹی کی مرہونِ منت ہے، جس کی سب سے بڑی مثال این آئی سی وی ڈی (NICVD) ہے جو دنیا کا سب سے بڑا مفت علاج کرنے والا ادارہ بن چکا ہے۔ انہوں نے دہرایا کہ یہ منصوبے عوام کے لیے ایک تحفہ ہیں اور وہ شہید بینظیر بھٹو کے مشن کو ہر صورت مکمل کر کے دم لیں گے۔