بیجنگ :وزیراعظم شہباز شریف کے دورۂ چین کے مقتدر مرحلے پر بیجنگ کے عظیم عوامی ہال (گریٹ ہال آف دی پیپل) میں ایک انتہائی اہم اور غیر معمولی سفارتی منظر اس وقت دیکھنے کو ملا جب چین کے وزیراعظم لی کیانگ اور پاکستان کے آرمی چیف فیلڈ مارشل سید عاصم منیر کے مابین ایک خصوصی غیر رسمی ملاقات ہوئی۔
یہ ملاقات بیجنگ میں منعقدہ پروقار استقبالیہ تقریب کے دوران ہوئی، جہاں دونوں رہنماؤں کا آمنا سامنا ہونے پر چینی وزیراعظم لی کیانگ نے روایتی گرمجوشی کے ساتھ فیلڈ مارشل سید عاصم منیر کا خیرمقدم کیا، ان سے مصافحہ کیا اور مخلصانہ تزویراتی جذبات کا تبادلہ کیا۔عالمی سفارتی ذرائع کا کہنا ہے کہ یہ غیر رسمی ملاقات ایک ایسے نازک اور تاریخی موڑ پر ہوئی ہے جب ایران اور امریکہ کے مابین طویل کشیدگی کے خاتمے میں فیلڈ مارشل سید عاصم منیر کے کلیدی اور مصالحتی کردار کا بین الاقوامی سطح پر اعتراف کیا جا رہا ہے۔ اس عالمی تزویراتی پسِ منظر میں چینی وزیراعظم اور پاکستان کی عسکری قیادت کے مابین اس مختصر مگر تپاک آمیز گفتگو کو دونوں ممالک کے مضبوط دفاعی و اسٹریٹجک روابط کا عکاس اور علاقائی امن کے لیے انتہائی اہمیت کا حامل قرار دیا جا رہا ہے۔
