واشنگٹن: امریکی صدر ڈونلڈ ٹرمپ نے ایران کو خبردار کرتے ہوئے کہا ہے کہ اگر تہران نے مزید حملے کیے تو امریکہ اس کا غیر معمولی شدت کے ساتھ جواب دے گا۔ ان کا کہنا تھا کہ امریکی مفادات، اتحادیوں اور خطے کے امن کو نقصان پہنچانے کی کسی بھی کوشش کا بھرپور جواب دیا جائے گا۔
ٹرمپ نے کہا کہ امریکہ صورتحال پر مسلسل نظر رکھے ہوئے ہے اور قومی سلامتی کے تحفظ کے لیے تمام ممکنہ اقدامات پر غور کیا جا رہا ہے۔
دوسری جانب امریکی نائب صدر جے ڈی وینس نے بھی ایران کو متنبہ کرتے ہوئے کہا کہ اگر آبنائے ہرمز کو دوبارہ بند کرنے کی کوشش کی گئی تو امریکہ فوری اور فیصلہ کن کارروائی کرے گا۔ ان کے مطابق یہ آبی گزرگاہ عالمی توانائی کی ترسیل کے لیے انتہائی اہم ہے اور اس میں رکاوٹ عالمی معیشت پر منفی اثرات مرتب کر سکتی ہے۔
امریکی صدر اور نائب صدر کے تازہ بیانات ایسے وقت میں سامنے آئے ہیں جب مشرقِ وسطیٰ میں کشیدگی برقرار ہے۔ مبصرین کے مطابق ان بیانات سے خطے میں سفارتی اور عسکری تناؤ مزید بڑھنے کا امکان ظاہر کیا جا رہا ہے۔
