اسلام آباد: وزیراعظم شہباز شریف نے پرائم منسٹر فیول ریلیف پروگرام میں رجسٹریشن بڑھنے اور مستحق شہریوں کو سبسڈی کی فراہمی میں پیشرفت پر اطمینان کا اظہار کیا ہے۔
وزیراعظم کی زیر صدارت منعقدہ اجلاس میں فیول ریلیف پروگرام پر عمل درآمد، رجسٹریشن کی صورتحال اور سبسڈی کی فراہمی کے نظام کا جائزہ لیا گیا۔
اس موقع پر شہباز شریف نے کہا کہ سبسڈی کے حصول کا طریقہ کار آسان بنانے کے باعث رجسٹریشن میں اضافہ ہوا ہے، جس کے نتیجے میں زیادہ مستحق شہری حکومتی ریلیف سے فائدہ اٹھا رہے ہیں۔
وزیراعظم نے پروگرام کی اب تک کی پیشرفت اور شفافیت کو اطمینان بخش قرار دیتے ہوئے کہا کہ طریقہ کار میں آسانی پیدا کرنے سے شہریوں کو سہولت حاصل ہوئی ہے اور زیادہ مستحق افراد تک سبسڈی کی رسائی ممکن ہو رہی ہے۔
اجلاس میں پروگرام کے تحت جاری اقدامات اور شفافیت برقرار رکھنے کے حوالے سے بھی جائزہ لیا گیا۔
