کاجول اور ٹوئنکل کھنہ کی جوڑی پیش کر رہی ہے نیا چیٹ شو، دلچسپ ٹیزر جاری

بالی ووڈ کی مشہور اداکارائیں کاجول اور ٹوئنکل کھنہ پہلی بار ایک ساتھ نئے چیٹ شو "ٹو مچ وِد کاجول اینڈ ٹوئنکل” میں میزبان کے طور پر ناظرین کے سامنے آئیں گی۔ حال ہی میں اس شو کا ٹیزر جاری کیا گیا ہے جو اس سال کے سب سے متوقع شوز میں شمار ہو رہا ہے۔

ٹیزر میں شو کی بے ساختہ اور دلکش گفتگو کی جھلک دکھائی گئی ہے، جہاں گپ شپ کے ساتھ ساتھ حقیقت پر مبنی بات چیت بھی شامل ہوگی۔ یہ پروڈکشن بانیجے ایشیا کے بینر تلے بن رہا ہے اور اس میں کئی بڑے بالی ووڈ ستارے مہمان کے طور پر شامل ہوں گے۔

پرائم ویڈیو کے نکھل مدھوگ نے کہا ہے کہ یہ شو دیگر چیٹ شوز سے مختلف ہوگا اور اس میں کاجول اور ٹوئنکل کی متضاد مگر خوبصورت کیمسٹری ناظرین کو خوب بھائے گی۔ شو کی پہلی قسط 25 ستمبر کو نشر ہوگی اور ہر جمعرات کو نئی قسط آتی رہے گی۔

شو کی پذیرائی میں شاہ رخ خان کی اہلیہ گوری خان نے بھی انسٹاگرام پر دلچسپ تبصرہ کیا ہے، جس پر ٹوئنکل کھنہ نے جواب دیا، جس سے مداحوں میں مزید جوش و خروش پیدا ہو گیا ہے۔ یہ شو بالی ووڈ کے شائقین کے لیے ایک خاص تفریحی موقع ثابت ہوگا۔