اسلام آباد: وزیراعظم شہباز شریف نے خطے کی بدلتی ہوئی صورتحال اور عالمی معاشی دباؤ کے پیشِ نظر ‘عوامی مفاد’ کو ریاست کی ترجیحات میں سرِفہرست کر دیا ہے۔ اسلام آباد میں منعقدہ جائزہ اجلاس کے دوران وزیراعظم نے ایندھن کی بچت اور شہریوں کو براہِ راست ریلیف دینے کے لیے ایک جامع روڈ میپ پیش کر دیا۔
وزیراعظم محمد شہباز شریف کی زیرِ صدارت ہونے والے اجلاس میں واضح کیا گیا کہ حکومت نے مشکل فیصلے کرتے ہوئے ترقیاتی بجٹ میں کٹوتی کی ہے تاکہ 125 ارب روپے کی خطیر رقم سے عوام کو مہنگے پیٹرول کے اثرات سے بچایا جا سکے۔ وزیراعظم نے اطمینان دلایا کہ ملک میں پیٹرولیم مصنوعات کے وافر ذخائر موجود ہیں اور گھبرانے کی کوئی ضرورت نہیں۔
وزیراعظم نے ایک نئی قومی بچت روایت کی بنیاد رکھتے ہوئے عوام اور سرکاری اداروں سے اپیل کی ہے۔دفاتر اور کام کی جگہوں پر جسمانی موجودگی کے بجائے ٹیلی کانفرنسنگ کو فروغ دیا جائے۔ ایندھن بچانے کے لیے غیر ضروری سفر سے مکمل پرہیز کیا جائے۔ایک دور رس اقدام کے تحت، وزیراعظم نے صوبائی حکومتوں کو موٹر سائیکل اور رکشہ مالکان کے لیے رجسٹریشن کے عمل کو سہل بنانے کا حکم دیا ہے۔
تمام چھوٹی سواریوں کے ڈیٹا کو ڈیجیٹائز کرنا تاکہ مستقبل میں حکومت کی جانب سے دیا جانے والا کوئی بھی ریلیف براہِ راست ان کے اصل مالکان تک پہنچ سکے اور کسی قسم کی ہیرا پھیری کی گنجائش نہ رہے۔
وزیراعظم نے متعلقہ حکام کو ہدایت کی ہے کہ چاروں صوبوں، آزاد کشمیر اور گلگت بلتستان کے چیف سیکریٹریوں کے ساتھ مل کر ان اقدامات کی کڑی نگرانی کی جائے تاکہ ریلیف کے ثمرات گراس روٹ لیول تک پہنچیں۔
Send an email
