لاہور: قذافی سٹیڈیم لاہور میں جاری پہلے ٹیسٹ میچ کے تیسرے روز پاکستان نے جنوبی افریقہ کے خلاف 109 رنز کی برتری حاصل کی، جب جنوبی افریقی ٹیم اپنی پہلی اننگز میں 269 رنز پر ڈھیر ہو گئی۔ پاکستان کی باؤلنگ کے دوران نعمان علی نے شاندار 6 وکٹیں حاصل کیں، جس کی بدولت جنوبی افریقہ کی ٹیم کم رنز پر آؤٹ ہو گئی۔
آج کے کھیل کا آغاز جنوبی افریقی ٹیم نے 216 رنز 6 کھلاڑی آؤٹ سے کیا۔ سینورن متھوسوامی اور ٹونی ڈی ذورزی نے اننگز کا آغاز کیا، مگر دونوں کھلاڑی جلد ہی پویلین واپس لوٹ گئے۔ سینورن متھوسوامی 11 رنز بنا کر ساجد خان کی گیند پر آؤٹ ہوئے، جبکہ ٹونی ڈی ذورزی 104 رنز پر نعمان علی کی گیند پر شاہین آفریدی کے ہاتھوں کیچ ہو گئے۔ اس کے بعد کگیسو ربادا اور سنورن متھوسامی بھی ساجد خان کی گیند پر آؤٹ ہوئے، اور یوں جنوبی افریقی ٹیم 269 رنز پر ڈھیر ہو گئی۔
پاکستان کے لیے سب سے کامیاب باؤلر نعمان علی رہے، جنہوں نے 6 وکٹیں حاصل کیں، جبکہ ساجد خان نے 3 اور سلمان علی آغا نے ایک وکٹ لی۔
پاکستان کی پہلی اننگز کا آغاز 313 رنز 5 کھلاڑی آؤٹ سے ہوا، جہاں محمد رضوان اور سلمان علی آغا وکٹ پر موجود تھے۔ محمد رضوان نے 75 رنز بنائے، لیکن وہ 362 کے مجموعے پر آؤٹ ہو گئے۔ اس کے بعد نعمان علی اور ساجد خان بھی جلد ہی پویلین لوٹ گئے۔ سلمان علی آغا نروس نائنٹیز کا شکار ہوئے اور 93 رنز بنا کر آؤٹ ہو گئے، جبکہ شاہین آفریدی 7 رنز پر آؤٹ ہوئے۔ حسن علی بغیر کوئی رن بنائے ناٹ آؤٹ رہے۔
جنوبی افریقہ کی جانب سے سینورن متھوسامی نے 6 وکٹیں حاصل کیں، جبکہ کگیسو ربادا اور پرینیلن سبریئن نے ایک ایک وکٹ لی۔
پہلے ٹیسٹ میچ کے دوران پاکستان نے ٹاس جیت کر پہلے بیٹنگ کا فیصلہ کیا، تاہم آغاز میں ہی عبداللہ شفیق 2 رنز پر ربادا کے ہاتھوں ایل بی ڈبلیو ہو گئے۔ اس کے بعد امام الحق اور شان مسعود نے ذمہ دارانہ بیٹنگ کی اور دونوں نے نصف سنچریاں مکمل کیں۔ شان مسعود 76 رنز اور امام الحق 93 رنز بنا کر آؤٹ ہوئے۔ بابر اعظم صرف 23 رنز بنا سکے، جبکہ سعود شکیل بغیر کھاتا کھولے پویلین لوٹ گئے۔
پاکستان کے کھلاڑیوں میں شان مسعود، امام الحق، سلمان علی آغا اور محمد رضوان نے اہم رنز بنائے، جبکہ جنوبی افریقی باؤلرز متھوسامی، ربادا اور سبریئن نے کامیاب باؤلنگ کی.
