فیصل آباد :پاک اور جنوبی افریقہ کے درمیان ون ڈے سیریز کا فیصلہ کن تیسرا میچ آج کھیلا جائے گا، جو دونوں ٹیموں کے لیے اہم امتحان ہوگا۔ سیریز اب تک ایک ایک سے برابر ہے، پہلے میچ میں پاکستان نے دو وکٹوں سے کامیابی حاصل کی تھی، جبکہ دوسرے میچ میں جنوبی افریقہ نے 8 وکٹوں سے فتح حاصل کر کے مقابلہ برابر کیا۔
فیصلہ کن میچ سے قبل دونوں ٹیموں نے اختیاری تربیتی سیشن کیا، جس میں کھلاڑیوں نے بیٹنگ، بولنگ اور فیلڈنگ کی مشقیں کیں۔ پاکستان کی جانب سے حارث رؤف، حسیب اللہ، فیصل اکرم اور حسن نواز سیشن میں شامل رہے۔
دوسرے میچ میں جنوبی افریقہ نے 270 رنز کا ہدف 2 وکٹوں کے نقصان پر حاصل کیا، جس میں کوئنٹن ڈی کوک کی ناقابل شکست 123 رنز کی شاندار اننگز قابل ذکر رہی۔ پاکستان کی جانب سے فہیم اشرف اور محمد وسیم جونیئر نے ایک ایک وکٹ حاصل کی۔
پاکستان نے پہلے بیٹنگ کرتے ہوئے 50 اوورز میں 269 رنز پر 9 وکٹیں بنائیں، ابتدائی اوورز میں فخر زمان اور بابر اعظم جلد آؤٹ ہوئے، تاہم صائم ایوب اور سلمان آغا کی شراکت نے اننگ کو مستحکم کیا۔
آج کا میچ دونوں ٹیموں کے لیے نہ صرف سیریز کے فاتح کا فیصلہ کرے گا بلکہ ہر ٹیم کے کھلاڑی اپنی کارکردگی سے ناظرین اور شائقین کرکٹ کے لیے یادگار لمحات بنانے کی کوشش کریں گے۔
