اسلام آباد : خطے کی کشیدہ صورتحال اور قومی سلامتی کے سنگین چیلنجز پر قابو پانے کے لیے پاکستان کی اعلیٰ سیاسی و عسکری قیادت ایک پلیٹ فارم پر متحد ہو گئی ہے۔ وزیراعظم شہباز شریف اور چیئرمین پیپلز پارٹی بلاول بھٹو زرداری کے درمیان ہونے والی اہم ملاقات میں مشرقِ وسطیٰ میں جاری تنازع اور امریکہ ایران جنگ کو روکنے کے لیے پاکستان کے ممکنہ ثالثی کردار پر تفصیلی مشاورت کی گئی۔
وزیراعظم ہاؤس میں منعقدہ اس اہم اجلاس میں ملک کی اہم سیاسی و انتظامی شخصیات شریک ہوئیں۔ وزیراعلیٰ سندھ مراد علی شاہ اور وزیراعلیٰ بلوچستان سرفراز بگٹی نے بھی ملاقات میں شرکت کی، جس کا مقصد صوبائی سرحدوں کی سیکیورٹی اور داخلی استحکام پر اتفاقِ رائے پیدا کرنا تھا۔
اجلاس میں نائب وزیراعظم اسحاق ڈار، وزیر خزانہ اور وزیر پیٹرولیم کے ہمراہ اعلیٰ عسکری حکام کی شرکت بھی متوقع ہے تاکہ جنگ کی صورت میں ملکی معیشت اور توانائی کی ترسیل پر پڑنے والے اثرات کا جائزہ لیا جا سکے۔ذرائع کے مطابق، پاکستان نے خطے میں امن کے قیام کے لیے ایک فعال سفارتی کردار ادا کرنے کا فیصلہ کیا ہے۔ پاکستان کی جانب سے امریکہ اور ایران کے درمیان کشیدگی کم کرنے اور مذاکرات کی راہ ہموار کرنے کے لیے ثالثی کی پیشکش پر سنجیدگی سے غور کیا جا رہا ہے۔ وزیراعظم شہباز شریف آج شام صدر آصف علی زرداری سے بھی ملاقات کریں گے، جس میں اس اہم سفارتی مشن کو حتمی شکل دی جائے گی۔
اجلاس میں اس بات پر زور دیا گیا کہ مشرقِ وسطیٰ میں کسی بھی قسم کا بڑا تصادم پاکستان کے لیے معاشی اور دفاعی لحاظ سے نقصان دہ ثابت ہو سکتا ہے۔ حکومت اور تمام سیاسی اسٹیک ہولڈرز نے اس بات پر اتفاق کیا کہ پاکستان کو ایک ذمہ دار ایٹمی ریاست کے طور پر عالمی امن کے لیے اپنا اثر و رسوخ استعمال کرنا چاہیے۔ پیٹرولیم مصنوعات کی فراہمی میں ممکنہ تعطل سے بچنے کے لیے ہنگامی ذخائر کی صورتحال کا بھی جائزہ لیا گیا۔
