کراچی :کراچی کی ویمن جیل انتظامیہ نے منشیات کی اسمگلنگ میں ملوث ہائی پروفائل خاتون ڈرگ ڈیلر انمول عرف پنکی کی سیکیورٹی کو شدید خطرے میں قرار دیتے ہوئے عدالت سے اسے کچہری نہ لانے کی اجازت مانگ لی ہے۔ جیل حکام کے مطابق ملزمہ کی ذاتی پیشی کے دوران نقصِ امن کا شدید ترین خدشہ موجود ہے۔
مقامی عدالت میں مقدمے کی سماعت کے دوران ویمن جیل کراچی کی سپرنٹنڈنٹ نے ذاتی طور پر پیش ہو کر ایک باضابطہ درخواست جمع کرائی۔ اس درخواست میں مؤقف اختیار کیا گیا ہے کہ ملزمہ انمول پنکی کو جیل کی بیرکوں سے نکال کر عدالت لانے اور پھر واپس منتقل کرنے کے پورے عمل کے دوران سیکیورٹی کے سنگین مسائل پیدا ہو سکتے ہیں، جو قانون نافذ کرنے والے اداروں کے لیے ایک بڑا چیلنج بن سکتا ہے۔
جیل انتظامیہ نے شہر میں امن و امان کی صورتحال اور ممکنہ خطرات کے پیشِ نظر عدالت سے استدعا کی ہے کہ ملزمہ کو جیل سے منتقل کرنے کے بجائے اس کی حاضری اور پیشی کو ویڈیو لنک (آن لائن) کے ذریعے ہی مکمل کیا جائے۔ عدالت نے جیل حکام کے ان خدشات پر مبنی درخواست کو باقاعدہ سماعت کے لیے منظور کرتے ہوئے ریکارڈ کا حصہ بنا لیا ہے۔
