لڑکی سے زیادتی کے الزام میں بھارتی کرکٹر پر مقدمہ

یش دیال پر جنسی ہراسانی کا ایک اور مقدمہ درج، جے پور پولیس نے فاسٹ بولر کے خلاف دوسری ایف آئی آر کا اندراج کر لیا
رائل چیلنجرز بنگلور کے فاسٹ بولر یش دیال کو ایک اور سنگین قانونی مسئلے کا سامنا ہے۔ جے پور پولیس نے ان کے خلاف ایک نابالغ لڑکی کو جنسی طور پر ہراساں کرنے کے الزامات کے تحت دوسری ایف آئی آر درج کر لی ہے۔
پولیس کے مطابق، یہ واقعہ سال 2023 سے تعلق رکھتا ہے، جب متاثرہ لڑکی کی عمر 17 برس تھی۔ رپورٹ کے مطابق، دیال پر الزام ہے کہ انہوں نے متاثرہ کو کرکٹ میں کیریئر بنانے کے خواب دکھا کر متعدد بار جنسی زیادتی کا نشانہ بنایا، اور اپریل 2025 میں ایک بار پھر جے پور کے ہوٹل میں زیادتی کی کوشش کی۔
نئی ایف آئی آر میں لگائی جانے والی دفعات کے تحت مجرم کو کم از کم دس سال قید کی سزا دی جا سکتی ہے۔ اس کے ساتھ ساتھ، ایف آئی آر میں بچوں کے خلاف جنسی جرائم کی روک تھام کےقانون متعلقہ دفعات بھی شامل کی گئی ہیں۔
یہ نیا مقدمہ ایسے وقت پر سامنے آیا ہے جب دیال پہلے ہی ایک الگ عصمت دری کیس میں شامل ہیں، جس کی شکایت ایک خاتون نے گزشتہ ماہ غازی آباد میں درج کروائی تھی۔ وہاں ان کے خلاف پہلا مقدمہ درج کیا گیا تھا۔
جے پور پولیس حکام کا کہنا ہے کہ معاملے کی تفتیش جاری ہے، اور قانون کے مطابق تمام شواہد کا جائزہ لیا جا رہا ہے۔