کینیڈا کی حکومت نے بھارت کے خطرناک مجرمانہ گروہ لارنس بشنوئی گینگ کو دہشتگرد تنظیم قرار دے دیا ہے، جس کے باعث اس گروہ کے اثاثے منجمد اور ضبط کیے جا سکیں گے۔
بشنوئی گینگ پر خالصتان تحریک کے رہنما ہردیپ سنگھ نجر اور بھارتی سیاستدان بابا صدیق کے قتل کے الزامات کے ساتھ ساتھ بھارتی اداکار سلمان خان کو قتل کی دھمکیاں دینے کا بھی الزام ہے۔ اس گروہ نے قتل، فائرنگ اور آتش زنی جیسے واقعات میں حصہ لیا ہے اور عوام میں خوف و ہراس پھیلایا ہے۔
کینیڈا کے وزیر برائے پبلک سیفٹی گیری آنند سنگاری نے کہا ہے کہ اس اقدام سے دہشتگردی کی مالی معاونت اور دیگر دہشتگرد سرگرمیوں کو روکنے میں مدد ملے گی۔ کینیڈا عالمی دہشتگردی کے خلاف جنگ میں اس فیصلے کو ایک مثبت قدم قرار دیتا ہے۔
