میونخ : پاکستان اور امریکہ کے درمیان تعلقات میں ایک بڑی بریک تھرو سامنے آئی ہے۔ جرمنی کے شہر میونخ میں پاکستان کے فیلڈ مارشل و چیف آف ڈیفنس فورسز، سید عاصم منیر اور امریکی وزیر خارجہ مارکو روبیو کے درمیان ہونے والی ملاقات نے عالمی سطح پر نئی بحث چھیڑ دی ہے۔
پاک امریکہ تعلقات کی موجودہ صورتحال کا ازسرنو جائزہ لیا گیا اور مستقبل میں تعاون کے نئے افق تلاش کرنے پر اتفاق ہوا۔ علاقائی سلامتی اور عالمی امن کے قیام کے لیے مشترکہ حکمت عملی اپنانے پر بات چیت ہوئی۔ دونوں رہنماؤں نے دہشت گردی کے خلاف جنگ میں ایک دوسرے کے تجربات سے سیکھنے اور انٹیلی جنس شیئرنگ کو بہتر بنانے کے عزم کا اعادہ کیا۔
فیلڈ مارشل سید عاصم منیر اور مارکو روبیو نے اس بات پر خصوصی زور دیا کہ خطے میں استحکام لانے کے لیے پاکستان اور امریکہ کا باہمی تعاون ناگزیر ہے۔ ملاقات کے دوران عالمی منظر نامے میں ہونے والی تبدیلیوں اور سیکیورٹی چیلنجز پر بھی سیر حاصل گفتگو کی گئی۔
مبصرین اس ملاقات کو دونوں ممالک کے درمیان فوجی اور سیاسی سطح پر "برف پگھلنے” اور "اعتماد کی بحالی” کا ایک مضبوط اشارہ قرار دے رہے ہیں۔
