لاہور : پنجاب میں جاری سیلابی صورتحال کے باعث ہلاکتوں کی تعداد 28 ہو گئی ہے۔ پی ڈی ایم اے کے مطابق سیلاب سے سب سے زیادہ متاثرہ علاقے قصور، اوکاڑہ، پاکپتن اور ساہیوال ہیں۔
ڈی جی پی ڈی ایم اے عرفان کاٹھیا کا کہنا ہے کہ بھارت میں بند ٹوٹنے سے پانی کا زور قصور کی طرف بڑھا، جس سے بچاؤ کے لیے مقامی بند کو شگاف دینا پڑا۔ ان کا کہنا تھا کہ ہیڈ سلیمانکی کے بعد ہیڈ اسلام پر بھی سیلاب کا دباؤ بڑھ رہا ہے۔
ریلیف کمشنر نبیل جاوید نے بتایا کہ حکومت کی ترجیح تمام متاثرہ آبادیوں کو محفوظ مقامات پر منتقل کرنا ہے، اور ریسکیو ٹیمیں الرٹ ہیں۔
حکام کا کہنا ہے کہ 1955 کے بعد ستلج میں یہ بدترین صورتحال ہے، تاہم تمام وسائل بروئے کار لا کر صورتحال پر قابو پانے کی کوشش کی جا رہی ہے۔
