انطالیہ: وزیراعظم شہباز شریف اپنے مشرقِ وسطیٰ کے دورے کے آخری مرحلے میں ترکیہ پہنچ گئے ہیں۔ انطالیہ ایئرپورٹ پر ان کا استقبال روایتی جوش و خروش سے کیا گیا، جہاں گورنر ہلوسی شاہین نے ان کی آمد پر خیر مقدم کیا۔
وزیراعظم کل پانچویں انطالیہ ڈپلومیسی فورم سے خطاب کریں گے۔ وہ موجودہ عالمی غیر یقینی صورتحال میں پاکستان کے کردار اور علاقائی استحکام کے لیے اٹھائے گئے اقدامات کو اجاگر کریں گے۔
وزیراعظم شہباز شریف اور ترک صدر رجب طیب اردوان کے درمیان ملاقات میں اسٹریٹجک شراکت داری پر بات ہوگی۔ اس کے علاوہ وہ فورم میں شریک دیگر عالمی سربراہان سے بھی ملیں گے۔
اس دورے کا مقصد برادر اسلامی ممالک (سعودی عرب، قطر اور ترکیہ) کے ساتھ پاکستان کے اقتصادی روابط کو ایک لڑی میں پرونا اور سرمایہ کاری کے نئے راستے تلاش کرنا ہے۔پاکستان خطے میں امن اور سفارت کاری کے ذریعے مسائل کے حل کا حامی ہے، انطالیہ فورم عالمی مکالمے کے لیے ایک اہم پلیٹ فارم ہے۔
