کراچی : پاکستان اور بنگلادیش کے درمیان براہ راست فضائی رابطے کی بحالی کے ساتھ ہی دونوں ممالک کے تعلقات میں ایک نئے دور کا آغاز ہو گیا ہے۔ 14 سال قبل منقطع ہونے والا فضائی سلسلہ آج سے دوبارہ جڑ جائے گا، جس کے لیے بنگلادیش کی قومی ایئرلائن ‘بیمان ایئر’ کا شیڈول جاری کر دیا گیا ہے۔
تاریخی پرواز: بیمان ایئر کی پرواز BG-341 آج رات ڈھاکہ سے کراچی کے لیے روانہ ہوگی، جو رات 11 بجے جناح انٹرنیشنل ایئرپورٹ پر لینڈ کرے گی۔ سول ایوی ایشن ذرائع کے مطابق، ابتدائی طور پر کراچی اور ڈھاکہ کے درمیان ہفتہ وار دو پروازیں آپریٹ کی جائیں گی، جن کی تعداد میں مستقبل میں اضافے کا امکان ہے۔
اس براہ راست پرواز کے ذریعے مسافر اب صرف 3 گھنٹے میں ایک ملک سے دوسرے ملک پہنچ سکیں گے، جبکہ اس سے قبل کنیکٹنگ فلائٹس کے باعث یہ سفر 10 سے 12 گھنٹے تک طویل ہو جاتا تھا۔
سفارتی ماہرین کا کہنا ہے کہ 14 سال بعد براہ راست پروازوں کا آغاز دونوں ممالک کے درمیان برف پگھلنے کی واضح علامت ہے۔براہ راست پروازوں سے کارگو کی ترسیل تیز ہوگی، جس سے ٹیکسٹائل اور دیگر شعبوں میں دوطرفہ تجارت کو تقویت ملے گی۔سول ایوی ایشن اتھارٹی نے کراچی ایئرپورٹ پر پہلی پرواز کی آمد کے لیے تمام انتظامات مکمل کر لیے ہیں۔ ایئرپورٹ حکام کے مطابق پہلی پرواز کے مسافروں کا استقبال روایتی انداز میں کیا جائے گا تاکہ اس تاریخی لمحے کو یادگار بنایا جا سکے۔
