ملک میں ترقی کی راہ میں رکاوٹ پی ٹی آئی ہے، معرکہ حق میں تاریخی کامیابی:احسن اقبال

ناروال: وفاقی وزیر منصوبہ بندی احسن اقبال نے کہا ہے کہ بھارت اور تحریک انصاف ایک ہی زبان بولتے ہیں اور امریکی صدر ٹرمپ کی وزیراعظم اور فیلڈ مارشل کی تعریف انہیں ہضم نہیں ہو رہی۔

انہوں نے کہا کہ غزہ امن بورڈ میں پاکستان کی شمولیت ایک اہم سفارتی کامیابی ہے اور معرکہ حق میں حاصل کی گئی کامیابی کی تاریخ میں مثال نہیں ملتی۔

احسن اقبال نے پی ٹی آئی پر تنقید کرتے ہوئے کہا کہ یہ جماعت ملک میں ترقی اور خوشحالی نہیں چاہتی۔ سابقہ حکومت نے خزانہ خالی چھوڑا، لیکن موجودہ حکومت نے ملک کو دیوالیہ ہونے سے بچا کر ترقی کی راہ پر گامزن کیا اور دو سال میں معیشت مستحکم ہو گئی۔

انہوں نے مزید کہا کہ معرکہ حق کی کامیابی کی طرح اڑان پاکستان پروگرام میں بھی کامیابیاں حاصل کی جائیں گی۔