اسرائیل میں حکومت سازی کا معمہ برقرار، نیتن یاہو کو اکثریت نہ مل سکی

تل ابیب :اسرائیل کے عام انتخابات کے ابتدائی نتائج کے مطابق وزیراعظم نیتن یاہو کا اتحاد حکومت سازی کے لیے مطلوبہ اکثریت حاصل کرنے میں ناکام رہا ہے۔ 92 فیصد سے زائد ووٹوں کی گنتی میں نیتن یاہو کے اتحاد نے 53 نشستیں حاصل کیں، جبکہ مخالف جماعتوں کے تبدیلی بلاک کو 48 نشستیں ملیں۔

انتخابات میں عرب جماعتوں نے مجموعی طور پر 19 نشستیں حاصل کیں، جن میں جوائنٹ لسٹ کی 12 اور اسلامی جماعت رام کی 7 نشستیں شامل ہیں۔ ان نتائج کے بعد حکومت سازی کے لیے مختلف سیاسی جماعتوں کے درمیان اتحاد اور حمایت حاصل کرنے کی کوششیں اہمیت اختیار کرگئی ہیں۔

سیاسی حلقوں میں اب یہ سوال زیرِ بحث ہے کہ گادی آئزن کوٹ کی قیادت میں تبدیلی بلاک عرب جماعتوں کی حمایت حاصل کرکے حکومت بنانے کی کوشش کرے گا یا جماعتوں کے درمیان اتفاقِ رائے نہ ہونے کے باعث ملک میں دوبارہ انتخابات کی نوبت آئے گی۔

حتمی نتائج کے اعلان کے بعد اسرائیلی صدر اسحاق ہرزوگ حکومت سازی کے لیے موزوں رہنما کو نامزد کریں گے۔ اس دوران مختلف سیاسی جماعتوں کے درمیان مشاورت اور ممکنہ اتحاد حکومت کی تشکیل میں اہم کردار ادا کریں گے، جبکہ نیتن یاہو نئی حکومت کے قیام تک نگراں وزیراعظم کی حیثیت سے ذمہ داریاں انجام دیتے رہیں گے۔