کراچی ،اسلام آباد: پاک بحریہ کی جدید ہنگور کلاس آبدوز پی این ایس/ایم ہنگور کی آمد کو ملک کی بحری تاریخ میں ایک اہم پیش رفت قرار دیا جا رہا ہے، جو سمندری دفاعی نظام کو مزید مؤثر بنانے کی جانب ایک بڑا قدم ہے۔
تفصیلات کے مطابق یہ جدید آبدوز پاکستان کی سمندری حدود کے تحفظ اور بحری آپریشنل صلاحیتوں میں اضافے کے لیے پاک بحریہ کے بیڑے میں شامل کی جا رہی ہے۔ پی این ایس/ایم ہنگور جدید اسٹیلتھ ٹیکنالوجی سے لیس ہے، جو اسے زیرِ آب طویل عرصے تک چھپ کر مؤثر کارروائی کرنے کی صلاحیت فراہم کرتی ہے۔
یاد رہے کہ “ہنگور” کا نام پاکستان کی بحری تاریخ میں خاص اہمیت رکھتا ہے، جب 1971 کی جنگ میں پاک بحریہ کی آبدوز ہنگور نے بھارتی جنگی جہاز “کھکری” کو تباہ کیا تھا اور ایک اور جہاز “کرپان” کو بھی نقصان پہنچایا تھا۔ یہی تاریخی پس منظر نئی ہنگور کلاس آبدوز کو مزید علامتی اہمیت دیتا ہے۔
یہ آبدوز چین میں تیار کی گئی ہے اور اس میں جدید سونار، ریڈار، سینسرز اور ہتھیاروں کے نظام شامل ہیں۔ یہ طویل فاصلے تک مار کرنے والے تارپیڈوز اور کروز میزائل استعمال کرنے کی صلاحیت بھی رکھتی ہے۔
مزید بتایا گیا ہے کہ اس میں نصب ایئر انڈیپنڈنٹ پروپلشن (AIP) سسٹم اسے طویل عرصے تک زیرِ آب رہنے اور مسلسل آپریشنز جاری رکھنے کی صلاحیت دیتا ہے، جو اسے موجودہ دور کی بحری جنگی ضروریات کے مطابق ایک اہم پلیٹ فارم بناتا ہے۔
