کراچی : پاکستان پیپلز پارٹی کے چیئرمین بلاول بھٹو زرداری نے کراچی کے شہریوں، بالخصوص فٹبال کے شائقین کے لیے ایک شاندار اعلان کرتے ہوئے انہیں فٹبال ورلڈ کپ کے تمام میچز لیاری کے انٹرنیشنل اسٹیڈیم میں لائیو دیکھنے کی باقاعدہ دعوت دے دی ہے۔
سوشل میڈیا پر جاری اپنے ایک خصوصی ویڈیو پیغام میں چیئرمین بلاول بھٹو زرداری نے کہا کہ اگر کراچی کے عوام ورلڈ کپ کے سنسنی خیز مقابلوں کا حقیقی جوش و خروش، روایتی جشن اور فٹبال کا اصل جنون دیکھنا چاہتے ہیں، تو وہ لیاری تشریف لائیں۔ انہوں نے بتایا کہ لیاری کے انٹرنیشنل اسٹیڈیم میں شہریوں کے لیے ورلڈ کپ کے تمام میچز بڑی اسکرین پر لائیو دکھانے کے خصوصی اور شاندار انتظامات مکمل کر لیے گئے ہیں۔
انتظامیہ کی جانب سے فٹبال کے اس عالمی میلے کو یادگار بنانے کے لیے درج ذیل اقدامات کیے گئے ہیں۔لیاری کے انٹرنیشنل فٹبال اسٹیڈیم کے اندر ایک بہت بڑی سکرین نصب کی گئی ہے تاکہ تماشائی لائیو گراؤنڈ جیسا ماحول محسوس کر سکیں۔
میچز دیکھنے کے لیے آنے والے نوجوانوں اور فیملیز کے لیے سیکیورٹی اور بیٹھنے کا بہترین اور پرسکون ماحول فراہم کیا گیا ہے۔لیاری کے علاوہ ملیر کے علاقے صدیق گوٹھ، کلری کے علی محمد محلہ اور سیفی لین سمیت شہر کے مختلف عوامی مقامات پر بھی بڑی اسکرینیں لگائی گئی ہیں۔ کراچی کا علاقہ لیاری فٹبال کے عشق میں دنیا بھر میں "منی برازیل” کے نام سے مشہور ہے۔ پیپلز پارٹی کی قیادت کا کہنا ہے کہ اس اقدام کا بنیادی مقصد لیاری کے اسی تاریخی فٹبال کلچر کو رونق بخشنا اور کراچی کے نوجوانوں کو ایک مثبت، صحت مند اور بین الاقوامی معیار کا تفریحی پلیٹ فارم مہیا کرنا ہے۔
