اسلام آباد: نائب وزیراعظم و وزیر خارجہ اسحاق ڈار سے مالدیپ کے صدر ڈاکٹر محمد معیزو نے ملاقات کی، جس میں پاکستان اور مالدیپ کے درمیان دوطرفہ تعلقات کے فروغ اور مختلف شعبوں میں تعاون بڑھانے کے امکانات پر گفتگو کی گئی۔
ملاقات میں تجارت، سرمایہ کاری، تعلیم، موسمیاتی تبدیلی اور سیاحت کے شعبوں میں باہمی تعاون کو وسعت دینے پر زور دیا گیا۔
اس موقع پر نائب وزیراعظم اسحاق ڈار نے بزنس فورم میں مالدیپ کے کاروباری وفد کی شرکت کا خیرمقدم کرتے ہوئے کہا کہ دونوں ممالک کے درمیان کاروباری روابط کا فروغ اقتصادی تعلقات کو مضبوط بنانے میں اہم کردار ادا کر سکتا ہے۔
اسحاق ڈار نے امید ظاہر کی کہ کاروباری روابط میں اضافے سے دونوں ممالک کے درمیان تجارت کے فروغ اور سرمایہ کاری کے نئے مواقع پیدا ہوں گے، جس سے باہمی اقتصادی تعاون کو مزید مستحکم بنانے میں مدد ملے گی۔
